Homiladorlik: Erkaklar nimaga moslashishi kerak?

Asosiy fikrlar

Homiladorlik paytida erkaklar o’zlarini e’tibordan chetda yoki ahamiyatsiz his qilishlari odatiy holdir.
Agar siz o’zingizni shunday his qilsangiz, bu sizga ayolingiz, do’stingiz yoki oila a’zolaringiz bilan bu haqida gaplashish kerakligini anglatadi.

E’tibor markazidan chetda qolib ketish hissi

Sizning turmush o’rtog’ingiz homilador bo’lganida siz turli xil reaksiyalar va his-tuyg’ularni boshdan kechirishingiz mumkin. Ba’zilarga boshqalarga qaraganda qiyinroq bo’lishi mumkin.

Homiladorlik paytida o’zingizni tashlab ketilgandek yoki ahamiyatsiz his qilishingiz odatiy holdir. Hatto turmush o’rtog’ingiz sizdan ham ko’ra homilasiga ko’proq e’tibor berayotganday tuyilishi mumkin.

Ammo farzandning dunyoga kelishi – bu ajoyib hodisa va ayol kishining homila bilan band bo’lib qolishi odatiy holdir. U sizni rad qilmayotganini tushunishga harakat qiling.

Tug’ruq oldi ko’riklarida chetda qolib ketish

Homiladorlik xizmatlari bilan bog’liq ba’zi tajribalar siz kutgandek bo’lmasligi mumkin.

Erkaklarni tug’ruq oldi jarayonlariga jalb qilish bo’yicha xizmatlar yaxshilanayotgan bo’lsa-da, ba’zida tizim erkaklar qiziqishini va ularning shu jarayonda qatnashishga bo’lgan ishtiyoqini hisobga olmaydi. Agar sog’liqni saqlash mutaxassisi ayolingizga faqat u farzand kutayotganday gapirsa, o’zingizni chetda qolganday his qilishingiz tabiiy.

Tug’ruq oldi ko’riklarida «Janob, siz o’z ishingizni bajarib boldingiz, endi buni bizga qoldiring» degan gaplarni ham aytishadi. Ayollar shifoxonasiga borsangiz hamma narsa ayollar uchun mo’ljallangan bo’ladi. Ba’zi ko’riklarda hatto men uchun joy yo’q edi, erkaklar hojatxonasini esa umuman topolmadim. Bu xuddi biror choyxonaga kirsangiz u yerdagilarning hammasi o’sha yerning odamlari-yu, siz esa chetdan kelib qolganday gap. Umuman olganda, bu ijobiy tajriba edi. Tug’ilish haqida gap ketganda, men o’zimni bu jarayonda to’laqonli his qilolaman va o’zimni shu jarayonning bir bo’lagi deb bilaman.
– Milton, dadalardan biri.

Homiladorlik paytida rashk, tajovuz va zo’ravonlik

Ba’zi erkaklarda homiladorlik paytida chetda qolib ketish rashk yoki g’azab kabi kuchli reaksiyalarni keltirib chiqarishi mumkin.

G’azab — bu oddiy insoniy tuyg’u – har bir kishi har qanday bosqichda g’azablanadi. Ammo agar g’azablanish holati tez-tez ro’y bersa yoki nazoratdan chiqib ketsa, bu muammoga aylanishi mumkin.

G’azablanganingizda jahlingiz chiqsa, chaqalog’ingizning onasini qo’rqitib, stressga solishingiz mumkin. Stress bolaga yo’ldosh orqali o’tadigan kortizolni ko’paytirishi mumkin va bu chaqalog’ingizga yomon ta’sir qiladi. Bu chaqalog’ingizning erta tug’ilishiga, vaznining yengil bo’lishiga va rivojlanishidagi muammolarga olib kelishi mumkin.

Agar siz bu tuyg’u g’azab yoki zo’ravonlikka olib kelishi mumkin deb o’ylasangiz, yordam so’rang. Shifokor bilan gaplashishingiz mumkin.

Homiladorlikda e’tiborsiz qolish va boshqa tuyg’ular bilan kurashish

Agar siz o’zingizni chetda qolganday his qilsangiz, kimdir: ayolingiz, do’stingiz yoki oila a’zolaringiz bilan gaplashishga harakat qiling.

O’z his-tuyg’ularingizni ayolingizga tushuntirishingiz sizni eshtishlariga va homila jarayoniga qo’shilishingizga yordam beradi.

Ochiq va samimiy muloqot sizga har qanday xafagarchilikni yoki tushunmovchiliklarni bartaraf etish imkoniyatini beradi. Buni kechroq emas, oldinroq qilish kuchli his-tuyg’ularni boshqarishga yordam beradi.

Agar siz boshqa dadani yoki bo’lajak dadani bilsangiz, undan o’z tajribasi haqida so’rashingiz mumkin. U ham ayolining homiladorligi paytida o’zini tashlandiq his qilganmi? Unga yordam beradigan biron bir maslahat berishganmi? Agar berilgan bo’lsa u qanday maslahat edi?

Siz har qanday stress va zo’riqishni mashqlar, nafas olish mashqlari, mushaklarni dam oldirish mashqlari, yoga va sizga yoqadigan yoki o’zingizni erkin his qilishga yordam beradigan boshqa mashg’ulotlar orqali kamaytirishingiz mumkin. Siz chaqaloq uchun mebel yasash yoki bolalar bog’chasining devorlarini bo’yash kabi loyihalar ustida bosh qotirishingiz mumkin.

Agar sizning ayolingiz haqiqatan ham chaqaloq narsalarini yoki chaqaloq ismlarini ko’rishni xohlasa, unga bu borada yordam berishingiz ham mumkin. Avvaliga g’alati tuyilishi mumkin, lekin siz ham bu ishlarga o’zingizni jalb qilsangiz, o’zingizni boshqacha his qila boshlaysiz.

Siz qila oladigan narsalar

Agar siz chetda qolganingizni his qilsangiz, turmush o’rtog’ingizga bu haqida ayting, sizni ham tug’ruq jarayoniga qo’shish imkoniyatini bering.
Siz o’z tajribangiz haqida oila a’zolaringiz, do’stlaringiz yoki boshqa farzand kutayotgan dadalar bilan suhbatlashishingiz mumkin. Ehtimol, ular ham shu tajribalarni boshidan o’tkazgan bo’lishi mumkin.
Agar siz homiladorlik tajribasidan tashqarida ekanligingizni his qilsangiz, sizni qo’shishlarini kutmang – o’zingiz qo’shiling! Bolalar kiyimiga yoki mebellariga qarashga vaqt ajratish ham ayolingiz bilan vaqt o’tkazish imkoniyatidir.
Stress va zo’riqishni kamaytirishga yordam beradigan mashqlar, mushaklarning dam olishi, chuqur nafas olish va boshqa mashqlarni bajarib turing.
Agar siz chetda qolib ketishingiz g’azab yoki zo’ravonlikka aylanishi mumkin deb o’ylasangiz, yordam so’rang. Shifokorga murojaat qiling.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi