Homiladorlik davridagi zo’riqish: erkaklar uchun

Asosiy fikrlar

• Homiladorlik siz va turmush o’rtog’ingiz uchun qiyin davr bo’lishi mumkin.
• Agar siz stressni yengish yo’llarini topa olsangiz, bu siz, turmush o’rtog’ingiz va chaqalog’ingiz uchun yaxshi.
• O’zingiz ishongan odam bilan gaplashing va otalikdan nimani kutish kerakligi haqida ko’proq bilib oling.
• Agar siz stressga dosh bermasangiz yoki g’azablansangiz, shifokoringiz bilan gaplashing.

Rafiqangiz homiladorligida siz nima uchun zo‘riqishni his etasiz?

Ota bo‘lishni kutayotgan erkaklar turli sabablar tufayli zo‘riqishni his etishadi. Bular pul bilan bog‘liq xavotirlar, munosabatlar, ishga bo‘lgan ehtiyoj va hokazolar tufayli bo’lishi mumkin.

Ota bo‘lish uchun ko‘plab o‘zgarishlar zarur. Ehtimol, oila ta’minotchisi bo‘lish yoki yangi tug‘ilgan chaqaloqqa g‘amxo‘rlik qilishga tayyor emaslik haqida qayg‘urayotgandirsiz. Balki o‘zingiz va juftingizga vaqt ketkazayotganingiz, yoki rafiqangiz e’tibori chaqaloqqa qaratilishi haqida xavotirga tushayotgandirsiz.

Zo‘riqishingiz rafiqangiz va chaqaloqqa qanday ta’sir qiladi?

Siz zo‘riqishni yenga olaman yoki u faqat mening muammom, deb o‘ylashingiz mumkin. Biroq kuchli zo‘riqish sizni xafa qilishi va boshqa insonlar bilan bo‘ladigan munosabatlaringizga ta’sir ko‘rsatishi mumkin. Aynan shu sababli atrofdagi kishilar bilan munosabatlarda jahldor bo‘lishingiz hamda rafiqangiz bilan ko‘p tortishib qolishingiz ehtimoli bor.

Agar zo‘riqishni yengish uchun spirtli ichimliklar, narkotik moddalar iste’mol qilsangiz yoki cheksangiz, stress vaqtida ulardan ko‘p foydalanayotganingizni payqashingiz mumkin. Bu esa yana-da ko‘proq tortishuvlarga sabab bo‘ladi.

Agar zo‘riqish nazoratingizdan chiqib ketsa, homilador rafiqangizga ham ta’sir ko‘rsata boshlaydi. Afsuski, bu chaqaloqning salomatligi va rivojlanishiga salbiy ta’sir qilishi mumkin. Masalan, homilador ayoldagi zo‘riqish homilaning erta tug‘ilishi, vaznining kamligi va rivojlanishdan orqada qolishiga olib kelish ehtimoli mavjud.

Nikohning buzilishi, oiladagi mojaro, oiladagi zo‘ravonlik yoki qashshoqlik sababli homilador ayolda zo‘riqish holatlari yuzaga kelsa, bu homila miyasi va boshqa organlarining rivojlanishiga salbiy ta’sir ko‘rsatishi mumkin. Zo‘riqish bolaning his-tuyg‘ulari va kelajakdagi xulq-atvoriga ham ta’sir qiladi.

Homiladorlikda zo‘riqishni yengish 

Zo‘riqishga e’tibor bermaslik undan xalos etmaydi. U borgan sari kuchayishi, o‘zingiz hamda atrofdagilarga yomon ta’sir qilishi mumkin.

Zo‘riqishni yengish usullarini topish siz, rafiqangiz va farzandingiz uchun ijobiy holat bo‘ladi.

Nimani kutish kerakligi haqida ko‘proq ma’lumot olishdan boshlashingiz mumkin. Chaqaloq tug‘ilgach, nimalar bilan yuzma-yuz kelish ehtimoli mavjudligini oldindan bilsangiz, zo‘riqishning oqibatlari u qadar yomon bo‘lmaydi. Quyidagilar haqida ma’lumot olishingiz mumkin:

• bizning yangi tug‘ilgan chaqaloqlar haqidagi ruknimiz bilan tanishib chiqing;
• chaqaloq va ota-ona bo‘lish haqidagi kitoblarni o‘qish;
• fikrlaringizni rafiqangiz, oilangiz, yaqindagina ota bo‘lgan do‘stingiz bilan o‘rtoqlashish;
• uyingiz yaqinida joylashgan yosh otalar maktabiga borish.

Zo‘riqishingizga sabab bo‘ladigan holatlarni o‘zingiz ishonadigan odamlar bilan muhokama qilish ham siz uchun foydali bo’ladi. Bu qiyin bo‘lishi mumkin. Chunki erkaklarda bu borada o‘zgalar bilan subatlashish imkoniyati kamroq.  Ko‘pchilik erkaklar qo‘rquv va hislari haqida o‘zgalar bilan suhbatlashishni qiyin deb hisoblashadi. Agar noqulaylikni yengib, fikrlaringizni ayta olsangiz, haqiqiy muammoni tushunish va yechim topishga muvaffaq bo‘lasiz.

Masalan, oilangizni moliyaviy jihatdan ta’minlash borasida xavotirlanayotgan bo‘lsangiz, bu borada tajribaga ega ota bilan suhbatlashishingiz mumkin. U maslahat berishi va fikrlari bilan o‘rtoqlashishi mumkin. Budjetni yozib borishni odatga aylantirish ham ijobiy fikr. Bu esa rafiqangiz bilan pulni sarflash va uni rejalashtirish haqida muhokamalarni boshlash uchun yaxshi sabab bo‘ladi.

Bajarishingiz mumkin bo‘lgan ishlar

• Kundalik hayotda zo‘riqishni kamaytirishga yordam beradigan narsalar haqida o‘ylang. Masalan, ishdan chalg‘ish uchun musiqa tinglash, uyga kelgach telefonni o‘chirib qo‘yish.
• Zo‘riqish haqida maqola o‘qish.
• Agar zo’riqishni his qilsangiz, o‘zingiz ishongan odam – oilangiz a’zosi, do‘stingiz bilan bu haqida suhbatlashish.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi