Yangi chaqaloqqa boshqa farzandlaringizni tayyorlash

1-12 yoshlar uchun

Asosiy nuqtalar

Siz yangi farzand ko’rayotganingizda, boshqa bolalaringiz buni katta qiziqish bilan kutishi va biroz xavotirga tushishlari mumkin.
Bu esa bola tug’ilishidan kamida 3-4 oy oldin bolangizga yangi farzand haqida tushuncha berishingizga sabab bo‘ladi.
Siz bolalaringiz bilan gaplashish, ularga chaqaloqlar haqida kitob o’qib berish, ularning tashvish-xavotirlarini tinglash, ularga mehr va e’tibor berish orqali ularni tayyorlab borishingiz mumkin.

Yangi chaqaloqqa boshqa farzandlaringizni tayyorlash: bolalaringiz bunday paytda o’zlarini qanday his qilishlari

Agar siz yangi bola ko’rish arafasida bo’lsangiz, boshqa farzandlaringiz bundan xursand bo’lishlari mumkin. Ammo ular sizning mehringiz va e’tiboringizni yangi tug’ilgan chaqaloq bilan bo’lishishni o’rganishlariga to’g’ri keladi. Bu ular uchun katta qadam bo’lishi mumkin, ayniqsa sizning farzandlaringiz hali ancha yosh bo’lsa. Ular o’zlarini onaning diqqat markazidan chetlatishayotgandek his qilishlari mumkin.

Deyarli barcha bolalar oilaga yangi chaqaloq qo’shilganda unga moslashish bosqichini boshidan o’tkazishlariga to’g’ri keladi. Ammo odatda chaqaloq taxminan 14 oylik bo’lguniga qadar, farzandlar o’rtasida ijobiy aka-ukalik, opa-singillik munosabatlari rivojlanadi.

Bolalarga yangi tug’ilgan chaqaloq haqida qachon aytish kerak

Agar siz yangi farzand ko’rishga tayyorgarlik ko’rayotgan bo’lsangiz, bolalarga yangi tug’ilgan chaqaloq haqida qachon aytishingiz va nimalarni aytishingiz o’zingizga bog’liq. Bunda farzandlaringizning yoshi ham muhim rol o’ynaydi.

Homiladorlikning boshida, ehtimol, bola tug’ilishidan kamida uch -to’rt oy oldin, farzandlaringizga tug’ilajak bolangiz haqida aytib berishingiz foydalidir. Siz avvaliga chaqaloqlar haqida umumiy gapirib berishingiz, undan so’ng esa bo’lajak chaqalog’ingiz haqida gapirishingiz mumkin.

Kichkintoylar vaqtni yaxshi tushunishmaydi, shunday ekan, siz bolangizga yangi chaqaloq tug’ilish arafasida ekanligini tushuntirayotganingizda, uning tug’ilish vaqtini biron-bir tanish voqea bilan bog’lashga harakat qiling. Masalan, oila a’zolaringizdan birining tug’ilgan kuni o’tganidan keyin ko’p o’tmay chaqaloq tug’ilishi haqida aytishingiz mumkin.

Yoshi kattaroq bolalar, chaqaloq qayerdan tug’ilishi, onaning qorin bo’shlig’iga qanday qilib tushib qolgani va u qanday chiqib ketishi haqidagi tafsilotlarni bilishni xohlashlari mumkin. Farzandlaringiz bilan suhbat davomida jinsiy aloqa haqida gap ketsa, eng yaxshisi yoshga mos ravishda, sodda qilib tushuntirganingiz ma’qul. Bunda sizga homiladorlik va tug’ilish haqidagi ko’plab kitoblar ham yordam berishi mumkin.

Bolalaringizni yangi tug’iladigan chaqaloqqa tayyorlash: maslahatlar

Yangi chaqalog’ingiz tug’ilishidan oldin, siz boshqa bolalaringizga oilaning yangi a’zosi haqida ijobiy fikr shakllantirishga hissa qo’sha olasiz. Buning uchun farzandlaringizga tayyorgarlik, muloqot va tushuncha kerak bo’ladi.

Tug’ilishdan oldin

Agar siz ushbu holatni ijobiy va hayajonli jarayonga aylantira olsangiz, farzandingiz oiladagi bu o’zgarishni nafaqat yangi tug’ilgan chaqaloq, balki oilaning barcha a’zolariga birdek tegishli ekanligini sezadi. Buni amalga oshirishga yordam beradigan ba’zi fikrlar:

Farzandlaringizga chaqaloqlar haqidagi ertaklarni o’qib bering. Rasmlar ko’rsating va oilangiz qanday qilib kattalashib borayotgani haqida gapirib bering.
Ularga o’zlarining chaqaloqlik davridagi suratlarini ko’rsating.
Farzandingiz chaqaloq ona qornidan turib, harkatlanayotganligini va tepayotganligini seza olishi uchun ularga ona qorniga tegishga ruxsat bering. Siz hatto shifokor yoki akusherga tashrif buyurganingizda bolalaringizni ham o’zingiz bilan birga olib borib, ularga chaqaloqning yurak urishini tinglashga imkon berishingiz mumkin.
Bo‘lajak chaqaloqqa tayyorgarlik ko’rish jarayoniga ularni ham jalb qiling. Uyingizni tayyorlashda, chaqaloqlar uchun kerakli buyumlar sotib olishda va uyni bezashingizda farzandlaringizning yordamidan ham foydalaning.
Farzandlaringiz bilan bo’lajak chaqaloq dunyoga kelganda qanday o’zgarishlar bo’lishini kutayotganliklari haqida gaplashing.
Agar farzandlaringiz yangi tug’ilgan chaqaloq haqida qayg’urayotgan bo’lsa, ular bilan qanday tashvishlar haqida o’ylashayotgani haqida suhbatlashing va ularni tinchlantiring. Ularga ko’proq mehr bering va quchoqlang. Shuningdek, ijobiy tomonlariga e’tibor qarating, masalan, ularga yana bir sevimli uka yoki singil dunyoga kelishi kutilayotganligini tushuntiring.

Farzandingizga oilada yangi bola tug’ilishi qanday bo’lishi haqida tushuncha berish ham yaxshidir.

Iloji bo’lsa, do’stlaringiz va ularning yangi tug’ilgan chaqaloqlari bilan birga vaqt o’tkazib turing. Farzandlaringiz yangi tug’ilgan chaqaloqlarning juda uyquchi bo’lishini, ularga g’amxo’rlik qilish kerakligini va ular bir zumda birga o’ynab ketadigan do’stlar bo’lolmasligini tushunib yetishi lozim!
Farzandlaringizga chaqaloq o’z ehtiyojlari mavjud bo’lgan alohida bir kichkina odamcha ekanligini anglating.
Farzandingizni boshqa bolalar bilan muloqot qilish va o’ynashga undang. Bu bolangizga yangi aka-uka, opa-singillari bilan yaxshi munosabatda bo’lish uchun kerakli ijtimoiy ko’nikmalarni rivojlantirishga yordam beradi. Ehtimol, siz bolalar o’yiniga qo’shilishingiz yoki butun oila a’zolarni jamlab, ham kattalar, ham kichiklar bilan birgalikda vaqtingizni maroqli o’tkazishingiz mumkin.

Agar sizning farzandingiz hojatxonadan mustaqil foydalanishga yoki katta to’shakda yotishga tayyor bo’lsa, bu o’zgarishlarni chaqaloq tug’ilishidan oldin boshlang yoki chaqaloq tug’ilganidan ma’lum vaqt o’tganidan so’ng amalga oshiring.

Kasalxonada qolish vaqtida

Ona tug’ruq tufayli kasalxonada qoladigan bo’lsa, farzandlarni tinchlantirishga, xavotirlanmasliklariga yordam beradigan ba’zi fikrlar:

Farzandlaringizga ularning onasi kasalxonada bo’lganida kim ularga g’amxo’rlik qilishini tushuntiring. Agar ular enagani yaxshi tanimasalar, ularga bunga ko’nikish uchun vaqt kerak bo’ladi.
Bolalaringiz yotog’i oldida turishi uchun oilaviy fotosuratlar chiqartirib qo’ying.
Iloji boricha bolalarning odatdagi kundalik tartibi saqlanishiga sharoit yarating. Bu ularga o’zlarini xavfsizroq his qilishlariga yordam beradi.
Kasalxonada qolish vaqtida ona va bolalar o’zaro aloqada bo’lishlari kerak. Agar ona ham, chaqaloq ham sog’lom bo’lsa, bolalar onasini ko’rib turishi uchun tashrif buyurib turishi kerak.
Farzandlaringiz oldingizga tashrif buyurgan paytida o’zlarining o’zgacha va sevikli ekanliklarini his eta olishlari lozim. Farzandlaringizga ularni ko’rganingizdan qanchalik xursand ekanligingizni ayting.

Chaqaloq uyga kelganda

Quyidagi g’oyalar yangi tug’ilgan chaqalog’ingiz uyga birinchi marta kelganida, qanday yo’l tutish kerakligini tushuntiradi:

Yangi tug’ilgan chaqaloqni birinchi marta tanishtirishdan oldin bolalaringizni (ayniqsa, ular hali kichkina bo’lishsa) mehr bilan mahkam quchoqlang.
Agar oila a’zolaringiz va do’stlaringiz yangi tug’ilgan chaqaloqqa sovg’a olib keladigan bo’lsalar, ularga boshqa bolalaringiz uchun ham biron-bir kichik sovg’a olib kelishini tayinlang. Sizning o’zingiz ham farzandlaringiz uchun kichik sovg’a olishingiz va sovg’ani yangi tug’ilgan chaqaloq nomidan berishingiz mumkin. Yosh bolalar sovg’a sifatida kichkina qo’g’irchoq olishni xohlashlari mumkin. Ular qog’irchoqlarni o’zlarining shaxsiy “chaqalog’i”dek ko’rishadi.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi