Nevrapatolog maslahatlari

Bola asab tizimining rivojlanishi va kasalliklari haqidagi muxlislarimizning savollariga «Godimmed» klinikasi nevropatologi  Samiyeva Nargiza javob beradilar.

1. Bolaning asabi buziladimi?

Ha, buziladi. Buni ota-ona to’g’ri qabul qilishi kerak.

2. Bosh miya ichki bosimi nima degani?

Bosh miya ichida qorinchalar mavjud bo’lib, atrofida suyuqlik bor. Har xil sabablarga ko’ra (shikast, infeksiya) shu suyuqlikning miqdori oshadi, natijada bosh miya bosimi koʻtariladi. Natijada bolada ko’p yig’lash, boshini orqaga tashlash va bezovtalik kuzatiladi.

3. Muddatidan oldin chala tug’ilgan bolaning asab tizimida muammo yuzaga kelishi 100%aniqmi?

Muammolar yuzaga kelishi 100% bo’lmasa ham, nevrologik o’zgarishlar yuzaga kelishi aniq. Bular, asosan, bosh miyaning gipoksiyasi bilan bog’liq holatlar – bola mushaklarining bo’shligi, sut emishining sustligi va hokazolardir.

4. Chillalik chaqaloq qattiq yig’lashining sababi asab tizimidagi muammo bo’lishi mumkinmi?

Chillalik chaqaloq yig’lashining sababi bosh miya bosimining oshishi, ichi buzilishi, sut yetishmayotgani va teri kasalliklari bo’lishi mumkin.

5. Bir yoshgacha bo’lgan bolaning ko’p yig’lashiga nima sabab bo’lishi mumkin?

Nevrologik tomondan bosh miya bosimining oshishi sabab bo’lishi mumkin.

6. Chaqaloq boshini qaysi davrdan boshlab ushlay olishi kerak?

Normada chaqaloq 2 oyligidan boshlab boshini ushlay oladi.

7. Chaqaloq oyoqlariga qachondan bosa olishi kerak?

Normada 2-3 oyligida oyoqlarini bosa oladi.

8. Chaqaloq tonusi nima degani?

Chaqaloq tonusi bu nevrologik holat bo’lib, bunda uning tana mushaklari tarrang holatga kelib, oyoqlarga qo’yganda ularning uchiga bosadi.

9. Bolani asablarini tinchlantirish uchun nima qilsa bo’ladi?

Onaning mehri va quchog’i — bolaning asabini tinchlantirishda eng foydali muolaja.

10. Maktab yoshidagi bolaning dars qilish davomida boshi og’rishiga nima sabab bo’lishi mumkin?

Maktab yoshidagi bolalarda bosh og’rig’iga asosan quyidagilar sabab bo’lishi mumkin: bosh miya bosimining oshishi, gijja, tez-tez kasal bo’lish, anemiya, qon aylanishining buzilganligi.

11. Bola yiqilganda miya chayqalganligini uy sharoitida qanday aniqlasa bo’ladi?

Miya chayqalgani belgilari:

• bir necha daqiqaga hushdan ketish;
• qusish;
• bosh aylanishi;
• bosh og’rishi;

12. Bolaning liqildog’i qachon yopilishi kerak?

Bolaning liqildog’i 1 yosh-u 4 oyligida yopiladi.

13. Maktab yoshidagi bolaning tez-tez siydik qistashiga nevrologik sabab qanday?

Nevrologik tomondan qo’rquv va kuchli asabiylashish sabab bo’lishi mumkin.

14. Maktab yoshidagi bolaning kechqurun siyib qo’yishi sababi nimada?

Kechqurun bolaning siyib qo’yishiga nevrologik jihatdan bosh miyada qon aylanishining buzilishi va buyrak-qovuqning reflektori sustligini sabab qilish mumkin.

15. Bolaning tana harorati oshganda talvsaga tushishi xavflimi?

Asosiy muolaja — tezda tana haroratini tushirish kerak va keyinchalik tana haroratini u darajagacha ko’tarmasligini ta’minlab turish kerak.

16. Bolaning uyquda talvasa bo‘lishining sababi nima?

Uyquda talvasa bo’lishiga sabab infeksiya, tana haroratining oshishi, tug’ilish jarayonidagi bosh miya shikastlari bo’lishi mumkin.

17. Bir yoshgacha bo’lgan bolaning boshini orqa tomonga tashlab yig’lashining sababi nima?

Bunga asosan ikki sababni aytish mumkin: bosh miya bosimining oshishi va bola mushaklari tonusining oshishi.

18. Bolada tutqanoqni tuzatsa bo’ladimi? Qayerda (Toshkentda)?

Bo’ladi. Davolanish uzoq vaqt dori-vositalar yordamida amalga oshiriladi. Toshkentda nevrologiya bo’limi mavjud bo’lgan barcha shifoxonalarda.

19. Bolada duduqlanish asab tizimiga bog’liq bo’lsa, Toshkentda qayerda davolasa bo’ladi?

Duduqlanishni tuman poliklinikasida va statsionarlarda davolasa bo’ladi.

20. Bolaning asab tizimida ba’zi patologiyalar mavjudligining alomatlari qanday?

Tez-tez bosh og’rishi, bosh aylanishi, asabiylik, holsizlanish, ko’ngil aynashi, besabab qusish, qo’rquv, xotira sustligi.

21. Toshkentda bolalar nevrapotologi qayerda mavjud?

Bolalar nevrapotologi barcha tuman poliklinikalarida mavjud.

22. Asab tizimida muammolari mavjud bolani emlatish mumkinmi?

Ha, mumkin. Faqat emlatishdan oldin shifokorga nevrologik kasallik mavjudligi haqida xabar berish kerak.

23. Bolada tili chiqishi muammolari mavjud bo’lsa, qaysi shifokorga murojaat qilish lozim?

Nevropotolog va logoped.

24. Asab tizimida muammolar diagnostika qilingan bolaga qanday mahsulotlarni yedirish foydali?

Mevalar, sut va qatiq mahsulotlari, baliq va vitaminga boy barcha mahsulotlar.

25. Asab tizimi kasalliklariga chalingan bolaga qanday sharoit foydali?

Toza havo, suzish va massaj muolajalari.

26. Asab tizimi kasalliklari tug’ma bo’ladimi?

Ha, tug’ma bo’lishi mumkin.

27. Homiladorlikda homilaning asab tizimiga ziyon yetkazmaslik profilaktikasi qanday?

• siqilmaslik, asabiylashmaslik;
• shamolamaslik;
• infeksion kasalliklardan xoli bo’lish;
• ko’proq dam olish;
• anemiyaning oldini olish va davolash.

28. Tug’ish davrida tug’ma asab tizimi kasalliklarini profilaktikasi qanday?

Tug’ruq jarayonini to’g’ri olib borish (akusher bilan oldindan maslahatlashish maqsadga muvofiq bo’ladi). Undan tashqari, tug’ish jarayonida bolaga shikast yetish xavfi bo’lsa, kesarevo yo’li bilan tug’ish.

Nevrologik kasalliklar bo’yicha savollaringiz boʻlsa, Toshkent shahridagi «Godimmed» klinikasiga murojaat qilishingiz mumkin.

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi