Farzandingizga namozga aloqador sovg‘a hadya eting!

Bismillahir Rohmanir Rohiym.
Alloh taologa bitmas-tuganmas hamd-u sanolar bo‘lsin.
Payg‘ambarimizga mukammal va batamom salavot-u durudlar bo‘lsin.

Namozga aloqador bo‘lgan sovg‘alar: joynamoz, tasbeh, ro‘mol, mushk anbar, soat, yopinchiq va shunga o‘xshash anjomlar.

Ayollardan biri aytadi: «Yoshligimda onam menga joynamoz sovg‘a qilgan edilar. Onam bu joynamozni juda chiroyli ravishda taqdim qilgan va bu men uchun eng chiroyli sovg‘a bo‘lgan. Shu sovg‘a meni namoz o‘qishimga va uni yaxshi ko‘rishimga sabab bo‘lgan. Oradan vaqtlar o‘tib, men turmushga chiqdim. Farzandimga huddi shunday sovg‘a berishni orzu qildim. Onam meni qanday xursand qilgan bo‘lsalar, men ham farzandimni huddi shunday xursand qilishni umid qildim. Biroq Alloh menga farzand nasib etmadi. Bir kuni men huddi shu sovg‘ani singlimning qiziga berishga qaror qildim. Shu sovg‘a bilan jiyanimni qanday baxtli va qancha xursand ekanligini ko‘rib o‘zim quvonib ketdim».

Qizlardan biri aytadi: «Otam meni bomdod namoziga juda ko‘p marotaba uyg‘otishga harakat qilar edilar. Biroq men bomdod namozini o‘qimasdan dangasalik qilar edim. So‘ngra, otam menga eng chiroyli sovg‘a joynamozni berib: «Bu joynamoz bomdod namozini o‘qiydigan insonga» deb aytdilar. Bu uslub oddiy va sodda bo‘lsa ham meni bomdod namozini o‘qishimga sababchi bo‘lib qoldi».

Onalardan biri aytadi: «Bir kuni farzandlarimni yig‘ib: «U kunda porloq chehralar bor. Ular kulgu bilan to‘la, yetgan xushxabardan xursand. U kunda bir chehralar borki, ularni g‘ubor bosgan. Ustini zulmat qoplagan. Ular, ana o‘shalar, kofirlar va fojirlardir». (Abasa surasi, 38-42 oyatlar)

Alloh taoloni shu oyatlarini farzandlarim bilan sharhlab, suhbatlashdim. So‘ngra, ularni namozini nazorat qilish uchun jadval tuzishga qaror qildim. Bu jadval shunday ediki, kim qaysi namozni o‘qisa, uning qarshisiga tabassum qilgan suratni yopishtirib qo‘yamiz. Kim namozini tashlab ketsa, o‘sha namozini qarshisiga qovog‘i soliq holatidagi suratni yopishtiramiz. Bu kelishuvimiz bir hafta davom etdi. Haftaning oxirida barchani yig‘dim. Kim qancha tabassum va xafa suratini to‘plaganini sanab chiqdim. Eng ko‘p tabassum suratini yig‘gan farzandimni ajoyib mukofot bilan taqdirladim. Shu tariqa namoz o‘qilmagan vaqtlar xafa holatda, namoz o‘qilgan vaqtlar xursandchilik bilan o‘tishini farzandlarim tushunib yetishdi va namozni muhabbat bilan o‘qiydigan bo‘lishdi.

Bir ota aytadi: «Men quyidagi jadvalni yozdim va ayvonga ilib qo‘ydim:

5 mahal farz namozlari, Sunnat namozlari, Masjidda o‘qilgan namoz, Vitr namozi, Zuho namozi. Har bir namozning muhimligini hisobga olib pul miqdorlarini ham belgilab qo‘ydim.

Farzandlarim bu jadvalni ko‘rib hayratlanishdi. Bu qanday jadval ekanligi haqida so‘rashdi. Men ularga: «Har kuni shu jadvalga qarab uxlashingizdan avval sizlarni yo‘l xaqqingiz va mukofotingiz beriladi» deb aytdim. Ular bu jadvalni ko‘rib juda xursand bo‘lishdi. Hattoki 3-4 yoshda bo‘lgan kichik o‘g‘lim tezroq katta bo‘lib, shunday mukofotni olishni xohladi. Kichik farzandimga boshqa bir uslubni qo‘lladim. Unga fotiha surasini, attahiyotni, kichik suralarni, tahorat olishni o‘rganganida va bundan boshqa amallarni qilayotganida unga mukofot berishni boshladim. Avval ayolim farzandlarimni namoz o‘qishi uchun ularni urshib toliqgan edi. Hozir esa, bir hafta mobaynida farzandlarimni o‘zi namozga harakat qilib, uni imkon boricha masjidda o‘qishga shoshilishadi. Negaki, ular ko‘proq mukofot olishni istashadi. Bu uslub ularni namozga muhabbatli qilib, uni qoldirmasdan o‘qishga sabab bo‘ladi.

Manba

Habibulloh Axmadovning “Namoz” kitobi asosida tayyorlandi