Bolalar uchun xavfsiz jihozlar ro‘yxati

Asosiy jihatlar
• Bolalar jihozini tanlayotganingizda mahsulotning yorlig‘iga e’tibor qarating.
• Sekond-hend mahsulotni tanlaydigan bo‘lsangiz uning holatini yaxshilab tekshirib oling.
• Bolalar mebellari va jihozlarini qurish va ulardan foydalanishda ishlab chiqaruvchi tomonidan taqdim etilgan ko‘rsatmaga rioya qiling.
• Bolani doim nazorat qilish va uni xavfsizlik choralariga o‘rgatish xavfsizlik garovidir.

Bolalar uchun xavfsiz jihozlarni tanlash

Bolalar uchun xavfsiz bo‘lgan jihozlarni sotib olishda quyidagilarga e’tibor bering:
• Iste’molchilar huquqlarini himoya qilish agentligidan bolalar xavfsizligi bo‘yicha so‘nngi ma’lumotlarni oling.
• Shuningdek, bolalar uchun xavfsiz jihozlar ro‘yxati bilan ham tanishishingiz mumkin.
• Standartlarga javob beradigan jihozlarnigina sotib oling, ijaraga yoki qarzga oling. Ulardagi maxsus yorliq mahsulotning munosib sharoitlarda ishlab chiqarilganini va sifatga javob berishini ko‘rsatadi.
• Yana maxsus saytlardan bolalar krovati va jihozlarini tanlashga doir maslahatlarni olishingiz mumkin.

Sekond-hend bolalar jihozlari

Do‘stlaringiz yoki qarindoshlaringiz sizga o‘zlari foydalangan bolalar jihozlarini taklif qilishlari yoki siz internet orqali shunday mahsulotlarni topishingiz mumkin. Bolangizning xavfsizligi uchun bunday mahsulotlarni foydalanishdan avval yaxshilab tekshirish lozim.
Umuman olganda, bolalar jihozi mustahkam va baquvvat bo‘lishi kerak. Barcha qismlar yoki biriktirilgan qismlar puxta o‘rnatilgan bo‘lishi lozim. Unda dag‘al yuza, o‘tkir qirralar, bo‘yoq qoldiqlari yoki burama mix kabi bo‘sh biriktirilgan qismlar bo‘lmasligi lozim.
Qurishingiz va foydalanishingizni osonlashtirish uchun jihozning to‘liq ko‘rsatmasi bo‘lishi kerak.

Bolalar krovati va to‘shagi

Xavfsiz krovat yoki to‘shak tanlashda quyidagilarga e’tibor bering:
• Mebelning standartlarga javob berishini tekshirib oling.
• Krovatda bolaning osilib tushishi mumkin bo‘lgan gorizontal to‘sig‘i yoki oyoq uchun tayanchi yo‘qligiga e’tibor bering.
• Ishlatishdan avval krovat qismlari mustahkam biriktirilganligiga e’tibor bering.
• To‘shakning qulay ekani va krovatga mos tushganini tekshiring.
Tekshirish uchun quyidagi o‘lchov birliklaridan foydalanishingiz mumkin:
• Krovat panjara to‘siqlari orasidagi masofa 50-95 mm bo‘lishi kerak – agar masofa 95 mm dan ortadigan bo‘lsa bolaning boshi kirib qolishi yoki uning yiqilishiga sabab bo‘lishi mumkin
• Krovat asosi bilan to‘siqning yuqori qismigacha o‘lchov kamida 600 mm bo‘lishi lozim, bu bolangiz turishni o‘rganganida yiqilib tushish xavfining oldini oladi.
• To‘shak chekkasi bilan krovat to‘siqlari orasidagi bo‘shliq 20 mm dan kam bo‘lishi kerak, aks holda bolaning boshi, oyog‘i yoki qo‘llari jarohatlanishi mumkin.
Krovatni sotib olib undan foydalanishni boshlagach, quyidagilar man qilinadi:
• Krovatga o‘zgartirish kiritish
• Yostiqlar, ko‘rpalar, krovat uchun maxsus aylanma yostiq va krovat bog‘ichlarini qo‘llash. Bu bo‘g‘ilish xavfini yuzaga keltirishi mumkin.

Bolalar manejlari

Bolalar manejlarini qisqa muddatgina qo‘llash mumkin.
Xavfsiz manej tanlash uchun quyidagilarga e’tibor qaratishingiz lozim:
• Standartlarga mos kelishini tekshiring.
• Manejning to‘shagi baquvvat ekani va uning to‘rt tomoniga tegib turishini nazorat qiling.
• Bolangiz sakrab chiqolmasligi uchun manej to‘siqlarining yetarlicha balandlikda ekaniga ishonch xosil qiling.
• Manej to‘siqlari qulflanishi oson bo‘lgan mustahkam usul bilan qotirilganiga ishonch xosil qiling. Qulflash qurilmasi bolangiz uni ocholmaydigan shaklda bo‘lishi kerak.
• Bolangizning vazni 15 kgdan oshganidan so‘ng manejdan foydalanishni to‘htating.
Yig‘ma va to‘siqli krovatlarning barchasida doim aniq yorliq bo‘lishi kerak, unda quyidagilar kiritilgan bo‘ladi:
• Qurish va qismlarni mustahkamlash bo‘yicha ko‘rsatma
• Har safar ishlatishdan avval krovatning to‘g‘ri qurilgani va xavfsiz ekanini tekshirish bo‘yicha eslatma
• Faqat maxsus o‘lchamga ega to‘shakni yoki ishlab chiqaruvchi tomonidan berilgan to‘shaknigina qo‘llash mumkinligi to‘g‘risida ogohlantirish
• Qo‘shimcha to‘shakdan foydalanmaslik to‘g‘risida ogohlantirish
Bolangizni manejga qo‘yishdan avval uning to‘g‘ri va mustakam qilib qurilganiga ishonch xosil qiling. Bu ayniqsa avval foydalanilgan manejni ishlatishda juda muhim.
Manejga hech qachon o‘zgartirish kiritmang.

Bolani ovqatlantirish stuli

Ovqatlantirish stulini sotib olishda quyidagilarga e’tibor qarating:
• Mahsulotning standartlarga mos ekanini tekshiring.
• Stulning mustahkam ekaniga, besh qismli himoya kamariga ega ekaniga e’tibor qarating – ular yelkalar, son va oyoqni ustidan o‘tishi kerak.
• Agar stul g‘ildirakka ega bo‘lsa, ularni qulf holatiga keltirish mumkinligini tekshiring.
• Yig‘iladigan stul bo‘lsa, uning qismlari mustahkam o‘rnatilganini tekshiring.
• Agar siz kattalar stulining orqa tomoniga o‘rnatiladigan bolalar ovqatlantirish stulini tanlaydigan bo‘lsangiz, uning sirpanib ketmasligiga va mustahkam o‘rnatilganiga ishonch xosil qiling.
• Stulning soddaroq dizaynga ega bo‘lganini tanlang, shunda tozalash ham oson bo‘ladi, yana bolangizning barmoqchalari oraliqlarga kirib qolish xavfidan holi bo‘lasiz.
Ovqatlantirish stulidan foydalanganda xavfsizlik qoidalariga rioya qilish
• Bolangiz yiqilib tushmasligi uchun hamisha himoya kamarlarini taqib qo‘ying.
• Bola stul bilan surilmasligi va ag‘darilib ketmasligi uchun stulni devor va shkaflardan uzoqroqqa qo‘ying.
• Stulni pardalar, jalyuzi iplari, deraza va elektr jihozlar kabi xavfli narsalardan uzoqroqqa qo‘ying.
• Har doim bolangizning stulga o‘tirishiga va undan chiqishiga yordam bering.
• Ko‘chma stullarni pastroq va surilib ketmaydigan stollarga tirab qo‘ying.
• Bola ovqatlantirish stulida ekanida uni nazoratsiz qoldirmang. Chunki u qo‘li yetishi mumkin bo‘lgan hamma narsaga tegishga urinadi.

Bolani kiyintirish uchun maxsus stol

Maxsus stol olishda quyidagilarga e’tibor bering:
• Stolda xavfsizlik kamarlari bor ekaniga va yon tomonda kamida 100 mm balandlikdagi to‘siq borligiga e’tibor bering.
• Stol yuzasida bo‘shliq yoki tirqishlar yo‘q ekaniga ishonch xosil qiling.
• Stolning mustahkam ekani va xavfsiz ekaniga e’tibor bering.
• Noqulaylik tug‘dirmasligi uchun stolning balandligi sizga mos ekanini tekshiring.
Kiyim almashtirish stolidan foydalanganda xavfsizlik qoidalariga rioya qilish.
Uyingizda bolangizning yiqilib tushishini oldini olish uchun uning kiyimlarini gilam ustida almashtirsangiz ham bo‘ladi.
Agar siz maxsus stoldan foydalanadigan bo‘lsangiz, quyidagilarga amal qiling:
• Barcha kerakli kiyimlar, salfetkalar, tagliklar va boshqa narsalar qo‘lingiz yetadigan joyda bo‘lishiga e’tibor qiling.
• Bolangiz maxsus stolda ekanida uni nazoratsiz qoldirmang. Doim qo‘llaringiz bilan uni ushlab turing.
• Katta farzandingizga maxsus stoldan uzoqroq turishini tayinlang.
• Stolning yon tomonidagi qismlarga ortiqcha og‘irlikka ega narsalarni qo‘ymang.

Bolalar uchun maxsus himoya to‘siqlari

Bolalar uchun himoya to‘siqlarini tanlashda e’tiborli bo‘lganingiz ma’qul.
Xavfsiz va qulay himoya to‘sig‘ini tanlash
• To‘g‘ri mahsulotni tanlayotganingizga ishonch xosil qilish uchun ishlab chiqaruvchining ko‘rsatmasini va ogohlantirish yorlig‘ini diqqat bilan o‘qib chiqing.
• Ochiladigan to‘siqlar oshib o‘tish kerak bo‘lgan to‘siqlardan ko‘ra qulayroq ekanini e’tiborga oling. Ular xavfsizroq hamdir.
• Oyoq harakati bilan oson ochiladigan to‘siqni tanlang. Himoya to‘siqlarini ochish uchun odatda qo‘shimcha kuch yoki ikkita alohida harakatni amalga oshirishga to‘g‘ri keladi.
• To‘siq panjaralari orasidagi masofa 50-95 mm atrofida ekanini tekshiring. Agar bu masofa kattaroq bo‘lsa bola uchun xavfli bo‘lishi mumkin.
• To‘siqda bolaning oyog‘ini qo‘yib ko‘tarilishiga imkon beradigan qismlar va to‘rlar yo‘qligini tekshiring. Shuningdek, unda o‘tkir qirralar va bo‘g‘ilib qolishga sabab bo‘ladigan mayda qismlar bo‘lmasligi lozim.
• Himoya to‘sig‘ining o‘lchami siz joylashtiradigan yuza uchun mos kelishini tekshiring. Ba’zi to‘siqlar kattaroq joylarda ishlatish uchun kattaroq o‘lchamda ishlab chiqarilgan bo‘ladi.
• Himoya to‘sig‘ini maxsus asbobsiz qotirish mumkin bo‘lsin. Biriktirilgan qismlar mustahkam bog‘langan bo‘lsa xavotirga o‘rin yo‘q.
Zinalarda himoya to‘siqlaridan foydalanish
• Uchtadan ko‘proq pog‘onaga ega zinalarda himoya to‘sig‘ini qo‘llashingiz mumkin.
• Tanlagan himoya to‘sig‘ingizning zinalarda ham qo‘llash mumkin ekanligiga va devor yoki panjaraga mahkam o‘rnatish mumkinligiga ishonch xosil qiling.
• Zinapoyaning yuqorisida va pastida ishonchli va mustahkam to‘siqlardan foydalaning.
• Barcha himoya to‘siqlari ham zinapoyaning yuqori qismiga o‘rnatish uchun mo‘ljallanmaganligini unutmang.

Bolalar uchun qo‘shimcha jihozlar

Agar bolalar belanchagi yoki stulidan foydalanadigan bo‘lsangiz, ularni stol usti yoki balandlikka emas, polga o‘rnatganingiz ma’qul. Agar bolangiz ag‘darilishni boshlagan bo‘lsa belanchakdan foydalanmaganingiz ma’qul.
Bolaning yurishiga yordam beruvchi qurilmani (xodunok) mutaxassislar tavsiya qilmaydilan. Undan foydalansangiz bolaning zinalardan tushib ketishi yoki tashqariga chiqib ketish xavfi mavjud bo‘ladi. Ushbu qurilma yordamida bola siz uning qo‘li yetmaydi deb o‘ylagan narsalarni olishi mumkin bo‘ladi.
Agar yurishga yordam beruvchi qurilmadan (xodunok) foydalanishga qaror qilsangiz xavfsizlik uchun ularning avtomatik tormoz tizimiga va xavfdan ogohlantiruvchi maxsus ko‘rsatmaga ega ekaniga ishonch xosil qiling. Bunday qurilmalardan iloji boricha kamroq, masalan 15 daqiqa foydalanish tavsiya etiladi, aks holda bola yurishni o‘rganishga sekinroq harakat qiladi.
Mutaxassislar sakraydigan arg‘amchilarni  ham tavsiya qilishmaydi. Ammo agar siz ulardan foydalanishga qaror qilsangiz har safar bolani unga o‘tkazishdan avval himoya kamarlari mustahkamlanganiga e’tibor qiling. Agar eshik romiga o‘rnatadigan bo‘lsangiz, romning bolangizning og‘irligini ko‘tara olishiga ishonch xosil qiling va qurilmani mustahkam o‘rnatilganini tekshiring.
Arg‘amchida bolani nazoratsiz qoldirmang va katta bolalaringizga arg‘amchidagi ukasini itarish yoki tortishni man qiling.