Raxit kasalligi va uning davosi

Bola organizmida D vitaminining yetishmovchiligi raxit kasalligiga, immunitet pasayishiga va ko’rish qobiliyatining buzilishiga olib keladi. Negadir, shifokorlar deyarli barcha bolalarda raxit bor, deb qo’shimcha vitamin D ichishni tavsiya qiladilar. Aslida, vitamin D yetishmovchiligini aniq bilmasdan uni qo’shimcha ravishda ichish organizmda vitamin D miqdorining oshib ketishiga sabab bo’ladi. Bu esa salbiy oqibatlarga olib kelishi mumkin. Qanday qilib bolaga tabiiy vitamin D yetyaptimi, yo’qmi aniqlasa bo’ladi?

Deyarli barcha vitaminlar organizmga ovqat orqali kiradi. Lekin D vitamini asosan quyosh nurlaridan teri orqali organizmga kiradi. Vitamin D oshqozon osti bezi, buyrak, yurak faoliyatiga ta’sir qiladi va organizm immun tizimini yaxshilaydi.

Shuning uchun bola tug’ilganidan boshlab har kuni kamida 10-15 daqiqa quyosh nurlari ostida bo’lishi kerak. Quyosh nuri kam bo’ladigan shimol mamlakatlarida bu, ayniqsa, alohida ahamiyat kasb etadi.

D vitaminining organizmdagi asosiy mohiyati u orqali qondagi kalsiy va fosfor moddalari organizmga singishidan iboratdir. Kalsiy esa, bolaning o’sayotgan suyaklariga va asab tizimiga juda kerakli modda.

Bolaga vitamin D yetmasligining alomatlari

– chaqaloqning tez-tez terlashi;

– chaqaloqning ortiqcha bezovtalanishi;

– boshidagi tepaboshning vaqtida yopilmasligi;

– kattaroq bolalarda tishlar bilan bog’liq muammolar;

– uzoqni yaxshi ko’rolmaslik;

– uyqu buzilishi;

– ishtaha yo’qligi;

– asablarning qo’zg’alganligi.

– tez-tez shamollash;

– immunitet pasayishi;

– tez charchab qolish.

Lekin yuqoridagi alomatlar boshqa kasalliklarga ham xos bo’lishi mumkin. Shuning uchun, vitamin D yetishmasligini aniq bilish uchun ota-ona e’tibori talab qilinadi.

Shuningdek, organizmda Vitamin D yetishmovchiligini qon tekshiruvi aniqlab berishi mumkin.

Qanday qilib vitamin D yetishmovchiligini tabiiy ravishda oldini olish mumkin?

1. Har kuni tushlik vaqtigacha bola bilan quyosh nurlari ostida aylanish lozim. Tushlikdan so’ng quyosh nurlari teriga zarar keltiradi.

2. Homilador ayollar haftasiga ikki marta yog’li baliq (syomga, forel, tunes) mahsulotlaridan iste’mol qilishlari kerak;

3. Bolaga haftada ikki marta syomga, forel, tunes balig’i yoki ularning konserva shaklidan ovqat tayorlab berish juda foydali. Baliq bolaning aqliy rivojlanishiga ham ijobiy ta’sir ko’rsatadi.

Baliqni duxovkada folgaga solib pishirish lozim. Bundan tashqari, baliq vitamin C ga boy sabzavotlar bilan iste’mol qilinsa, vitamin D organizmga yaxshi so’riladi.

4. Bola nonushtasida tuxum sarig’i va sariyog’ bo’lib turishi ham foydali.

Kasha va non mahsulotlarini ko’p yeydigan bolalarning, ayniqsa, vitamin Dga ehtiyoji katta bo’ladi.

Shuni ta’kidlash kerakki, vitamin D yetishmovchiligi raxit kasalligiga olib kelsa, uning organizmda ortib ketishi ham salbiy oqibatlarga sabab bo’ladi.  Shuning uchun vitamin D qo’shimcha vitamin tarzida qabul qilinsa, shifokor bilan maslahatlashib, uni me’yoridan ortib ketmasligini ta’minlash zarur.

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi