Yangi tug’ilgan chaqaloqda kindik ko’chishi – muhim jarayon

Tug’ruqxonadan uyga chiqqach chaqaloqning kindigi hali tushmagan bo’ladi. Shu davrda chaqaloq kindigida muammolar: kindik yiringlashi, kindikning uzoq tushmasligi, kindikdan suyuqlik ajralishi kabi holatlar kuzatilishi mumkin. 

Yangi tug’ilgan chaqaloqning kindigi tushishi uchun 1-2 hafta talab etiladi. Bu davrda kindik yiringlab, kindik yarasiga infeksiya tushmasligiga e’tiborli bo’lish kerak. 

Ko’pchilik kindikni tezroq «quritish» maqsadida spirt bilan artib turishni tavsiya etadi. Aslida, yara qanchalik quruq bo’lsa, shuncha yaxshi. Spirt terini qichitib yoki qizartirib yuborishi mumkin. Bundan tashqari, har qanday suyuqlik yara bitishini sekinlashtiradi. 

Kindik tushmagan davrda muhimi uning atrofini quruq tutishdir. Shuningdek, bolaning terlamasligini ta’minlash lozim. Ortiqcha terlash kindik bitib ketishiga to’sqinlik qiladi, shu bilan birga ter oqqan joyda infeksiya tarqalishi oson bo’ladi. 

Kindik ko’proq ochiq havo bilan kontakt qilishi kerak. Ochiq havo yara tuzalishini tezlashtiradi. 

Chaqaloqqa taglik taqayotganingizda kindikni yopib qo’ymasligiga e’tibor qiling. Taglikning yuqori qismini kindikka yetkazmagan holida asta bukib taqish lozim. Taglik ichida kindik bug’lar tufayli doimiy ravishda nam holatda bo’ladi, bu esa uning uzoq vaqt bitmasligiga va infeksiya tarqalishiga olib kelishi mumkin.

Chaqaloqni cho’miltiryotganingizda bitmagan kindigi ho’l bo’lmasligi muhim. 

Hech qachon quriyotgan kindikni kuch ishlatib tushirishga harakat qilmang. Kindik o’z vaqtida yetarlicha qurigan holda tushib ketishi lozim.

Talab etilsa, quloq tozalagich bilan kindik atrofini asta-asta artib qo’ysa bo’ladi. 

Kindik va uning atrofida  biror muammo borligi alomatlari:

• kindikning o’zi yoki atrofdagi terisi qizargan;
• kindik joyi ishib qolgan;
• kindikdan suyuqlik ajralmoqda;
• kindikdan yomon hid kelmoqda;
• bolaga kindik joyi og’riq berayotgandek tuyilmoqda.

Ushbu alomatlardan biri namoyon bo’lsa, darhol shifokorga murojaat etish lozim. Uy sharoitida chaqaloq kindigi muammolarini davolash mumkin emas. Ba’zida kindikning yiringlashi chaqaloq hayotiga xavf soladi. 

Qurigan kindik tabiiy ravishda tushib ketgach uning o’rnida juda oz miqdorda qon tomchisi yoki oz miqdorda sarg’ish suyuqlik ajralishi kuzatilishi mumkin. Bu holat normal bo’lib 5-6 kunda o’tib ketishi kerak. O’tib ketmayotgan bo’lsa, shifokorga murojaat etish talab etiladi. Kindik ichida infeksiya ehtimolini yo’q qilish zarur.

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi