Homilador ekaningizdan xabar topdingiz: sizning hislaringiz

Asosiy jihatlar

·   Homilador ekaningizdan xabar topganingizda turli hislar qurshovida qolasiz.

·  Tuyg‘ularingizni o‘zingiz ishonadigan inson bilan bo‘lishishingiz mumkin. 

·  Ona bo‘lishga tayyorgarlik ko‘rishni boshlab homiladorlik to‘g‘risidagi qorishiq tuyg‘ularni nazorat qilishingiz mumkin bo‘ladi. 

· Homiladorlik bo‘yicha xavotirga tushsangiz yoki bezovta bo‘lsangiz shifokor bilan gaplashing. 

Siz homiladorsiz: sanoqsiz va qorishiq tuyg‘ular 

Homilador ekaningizdan xabar topganingizda turli hislar qurshovida qolasiz, bular baʼzan qorishiq tuyg‘ular bo‘lishi ham mumkin.

Xayratlanish, ikkilanish yoki ishonchsizlik 

Siz xayratlanishingiz, o‘zingizni yo‘qotib qo‘yishingiz yoki xatto ishonmasligingiz ham mumkin – bunga homilador bo‘lish uchun tayyorgarlik ko‘rmaganingiz yoki kutganingizdan ko‘ra tezroq bu xabarni olganingiz sabab bo‘lishi mumkin. Homilador ekaningizni singdirishingiz uchun sizga maʼlum vaqt kerak bo‘lishi mumkin.

 Xursandchilik va hayajon

Siz tabassum qilish va kulishdan o‘zingizni to‘htata olmay qolishingiz mumkin. Agar atrofingizdagilarga yangilikni aytmagan bo‘lsangiz, ular sizni nima bunchalar baxtiyor etganiga xayron qolishlari mumkin. Bu bilan go‘yo boshqalar bilan bo‘lisha olmaydigan sirga ega insonga o‘xshaysiz.

Xavotir, qo‘rquv va asabiylashish  

Siz endi nima bo‘ladi deb ikkilanishingiz mumkin. Yoki umr yo‘ldoshingiz bilan munosabatlaringiz o‘zgarishi yoki qanday ota-ona bo‘lishingizni o‘ylab xavotirga tushishingiz mumkin. Shuningdek, farzandni dunyoga keltirish jarayoni haqida o‘ylab biroz asabiylashishingiz yoki qo‘rqishingiz mumkin.

Yana homilador ekaningiz tasdiqlanmasidan avvalgi haftalarda sog‘lom bo‘lganligingiz haqida ikkilanib xavotirga tushishingiz mumkin, masalan o‘sha vaqtlarda muddati o‘tgan pishloq yemaganmidim yoki spirtli ichimlik ichmagandim deb o‘ylab qolasiz.

Qanday tuyg‘ular qurshovida ekaningizni aniq bilmaysiz
Homiladorlik haqida eshitgach o‘zingizni qanday his qilayotganingizni anglay olmasangiz hech qisi yo‘q. To‘g‘ri, tuyg‘ularni boshdan kechirishning yagona yo‘li yo‘q.  Siz va sizning turmush o‘rtog‘ingiz turlicha hislar taʼsirida bo‘lishingiz mumkin.

Baʼzi insonlar o‘z holatlaridan kelib chiqib qanday hislar taʼsirida ekanini bilmasliklari mumkin. Masalan, turmush o‘rtog‘ingiz sizga va farzandingizga g‘amxo‘rlik qilmaydigan inson bo‘lishi yoki siz yolg‘iz ona bo‘lishingiz mumkin. Yana yaqindagina bola tushishi yuz bergan bo‘lishi va siz yangi homiladorlik borasida o‘zingizni qanday tutish kerakligini aniqlab ololmagan bo‘lishingiz mumkin.

Agar siz davolanishlardan so‘ng yoki EKO yordamida homilador bo‘lgan bo‘lsangiz, niyatingizga yetganingizdan xursand bo‘lishingiz, shu bilan birga homiladorlik qanday kechishini o‘ylab xavotirga ham tushishingiz mumkin.

Homiladorlik bilan bog‘liq tuyg‘ularingizni nazorat qilishning ijobiy yo‘llari 

Homiladorlik borasidagi qorishiq tuyg‘ularni nazorat qilish usullardan biri o‘zingizni ona bo‘lishga tayyorlab borishdir. Bu sizga ushbu holatning quvonchli tomonlariga eʼtibor qaratishga va farzandingiz bo‘lishi haqidagi fikrni yaxshiroq anglashingizga yordam beradi.

Ona bo‘lishga tayyorlanar ekansiz quyidagilarni amalga oshirishingiz mumkin: 

·  Farzandingiz qanday bo‘lishi mumkinligini tasavvur qilib ko‘ring va homiladorlik chog‘ingizdayoq u bilan muloqot qilib turing. Unga kuylab berishingiz yoki suhbatlashishingiz mumkin – bolangiz sizni eshita oladi. Yana qorningizni mayin silab qo‘yishingiz ham mumkin.

·  Ona bo‘lish siz uchun qanday ahamiyatga ega ekanligi to‘g‘risida va qanday ona bo‘lishingiz mumkinligi haqida o‘ylab ko‘ring.

·  Umr yo‘ldoshingiz bilan farzand o‘stirishda nimalarga eʼtibor berish kerakligi haqida fikr almashing.

·  Homiladorlik davrida turmush o‘rtog‘ingiz bilan munosabatlaringizda yuzaga kelishi mumkin bo‘lgan o‘zgarishlarga tayyorlaning. Buning uchun u bilan suhbatlashib olganingiz eng to‘g‘ri yo‘l bo‘ladi.

·  Yaxshi ovqatlanish, faol bo‘lish, imkon bo‘lganda dam olish, stressdan uzoq bo‘lish va o‘zingiz yoqtirgan mashg‘ulotlar bilan shug‘ullanish orqali o‘zingizga eʼtibor qarating. Chekish yoki spirtli ichimlik ichish kabi zararli odatlarni tark etish orqali hayot tarzingizni o‘zgartirishingizga to‘g‘ri keladi. Sog‘lom hayot tarziga amal qilish orqali farzandingizning o‘sishi uchun kerakli narsalarni bera olasiz.

·  Shifokor yoki ayollar maslahatchisi bilan suhbatlashib yoki homiladorlar uchun tashkil qilinadigan suhbatlarda ishtirok etib homiladorlik va farzandingiz tug‘ilgach unga qanday g‘amxo‘rlik qilish kerakligi to‘g‘risidagi maʼlumotlar bilan tanishib chiqing. Shuningdek, homiladorlik va yangi tug‘ilgan chaqaloqlar parvarishi borasidagi maqolalarni o‘qib chiqishingiz mumkin. Bilimlaringizni oshirish o‘zingizga bo‘lgan ishonchning ortishiga va ona bo‘lishga tayyorlanishingizga yordam beradi.

Bundan tashqari ko‘mak guruhini rejalashtirish va tashkil qilish ham foydali bo‘lishi mumkin. Ko‘mak guruhi sizga va umr yo‘ldoshingizga yangi ota-ona sifatida amaliy va ruhiy tayanchga ega bo‘lishingizni taʼminlaydi. Farzandingizni hayotining ilk kunlaridanoq ijobiy, qo‘llab-quvvatlovchi munosabatlar qurshovida o‘stirishingiz ularning miyasi rivoji, ijtimoiy muvaffaqiyati, kirishuvchanligi va boshqa xislatlari uchun foydali bo‘ladi.

Sizning ko‘mak guruhingiz oila aʼzolaringiz, do‘stlaringiz, atrofingizdagi insonlar va shifokor yoki ayollar maslahatchisi kabi mutaxassislardan iborat bo‘lishi mumkin. Shuningdek siz oilaviy hamshira yoki oilaga xizmat ko‘rsatish markazlaridan sizni ota-onalar uchun tashkil qilingan guruhlarga yo‘llab qo‘yishlarini so‘rashingiz mumkin.

Homilador bo‘lish bilan bog‘liq murakkab ruhiy holat uchun yordam olish

Agar sizda biron xavotir, qo‘rquv yoki boshqa muammolar bo‘lsa bu haqda shifokoringiz yoki ayollar maslahatchisi bilan fikr almashganingiz maʼqul.

Tibbiyot mutaxassisi sizni qiynayotgan ko‘p mavzular borasida sizni xotirjam qilishi mumkin. Masalan, ular homiladorlikning ilk haftalarida sodir bo‘lgan ishlar farzandingizning o‘sishida katta taʼsirga ega emasligini aytishlari mumkin.

Homiladorlikni davom ettirish borasida ishonchingiz komil bo‘lmasa bu borada shifokor bilan maslahatlashing.