Yetim Ahmad

Podshohning xodimlaridan biri saroy eshigi oldiga chaqaloq tashlab ketilganini ko‘rib qoldi va podshohga xabar berdi. Podshoh uni ko‘rib yuragi achishdi va oilasiga qabul qilib, Ahmad deb ism qo‘ydi. Bolakay juda ziyrak va epchil bo‘lib voyaga yetdi. Shu bois podshoh saroy ishlarini Ahmadga topshirib qo‘ydi.

Kunlarning birida podshoh Ahmadga topshiriq berdi. Topshiriqni bajarishga ketayotib, Ahmad bir cho‘ri va xodimning xazinadan tilla o‘g‘irlayotganini ko‘rib qoldi. Bundan qattiq qo‘rqib ketgan xizmatkorlar undan podshohga aytmasligini iltimos qilishdi. Ahmad faqat qayta o‘g‘irlik qilmaslik sharti bilan ularni kechirdi.

Ahmad xazina eshigini berkitishga harakat qildi, lekin xonaning qulfi buzilgan edi. Temirchining oldiga borib yangi eshik yasatdi va uni hech kim ocha olmaydigan qilib berkitib qo‘ydi.

Cho‘ri esa siri fosh bo‘lishidan qo‘rqib to‘g‘ri podshohning oldiga borib yig‘lay boshladi va unga: “Men yetim Ahmadning xazinadan mol o‘g‘irlayotganini ko‘rdim. U mendan hech kimga xabar bermasligimni so‘radi va xazina eshigini tuzatish uchun temirchining oldiga ketdi”, dedi.

Podshoh qattiq darg‘azab bo‘lib cho‘rining gapini tekshirib o‘tirmasdan Ahmadni qatl qilmoqchi bo‘ldi va xizmatkorlarning boshlig‘iga: “Agar oldingga bir lagan kumush so‘rab borgan odamni yuborsam, uni qatl qil”, dedi. Birozdan so‘ng Ahmadni chaqirdi va: “Falonchining oldiga borib bir lagan kumush so‘ra, keyin menga olib kel”, dedi. U podshohga itoat qilib yo‘lga tushdi. Xodimlardan biri kumush tangalarni olib kelish uchun xazinadan mol o‘g‘irlagan xodimni jo‘natib yubordi. Borib kumush so‘ragan mahal esa uni qatl etishdi.

Podshohning oldiga xodim qatl qilingani haqida xabari keldi. Ahmad esa sog‘-salomat edi. Shunda podshoh Ahmaddan nima bo‘lganini so‘radi. U barcha voqeani aytib berdi. Podshoh yana Ahmadga ishonch bildirib, muhim vazifalarni unga topshirdi.

Saboq: inson to‘g‘ri yo‘lda yurar ekan, ishlari o‘z-o‘zidan to‘g‘rilanadi. Biror musibatga uchrasa ham, Yaratgan najot beradi.

«365 kunga 365 ibratli hikoya» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi