FARZANDNING OTA-ONA OLDIDAGI BURCHLARI

Alloh taolo ota-onaning darajasini yuksaklarga ko‘tardi. Qurʼoni Karimda O‘zidan so‘ng ota-onaga shukr qilishga buyurdi: «Menga va ota-onangga shukr qil» (Luqmon surasi, 14-oyatidan).

FARZANDNING OTA-ONA OLDIDAGI BURCHLARI:

1. Ota-onaga yoshlikda qanday bo‘lsa, ulg‘ayganda ham xuddi shunday itoat qilish;

2. Ularga yaxshilik qilish. Qurʼoni Karimda «Ota-onaga yaxshilik qil», deyilgan.

3. Ularni eʼzozlash, hurmatlarini joyiga qo‘yish, qo‘llaridan o‘pib, cheksiz hurmat ko‘rsatish;

4. Ulardan toqatdan ortiq narsa talab qilib, toliqtirib qo‘ymaslik;

5. Ota-onani har qanday insondan ustun qo‘yish. Yaxshilik qilmoqchi bo‘lsa yoki biror narsa hadya qilmoqchi bo‘lsa, avval ota-onadan boshlash;

6. Doimo Allohga duo qilib, ularning haqqiga rahmat, mag‘firat so‘rash.

Alloh taolo shunday marhamat qilgan:

وقل رب ارحمهما كما ربياني صغيرا

«Robbim, ular meni go‘daklik chog‘imda tarbiyalaganlaridek, Sen ham ularga rahm qilgin» (Isrosurasi, 24-oyat)

7. Ularga hech qachon g‘azab qilmaslik, hatto “Uf” ham demaslik. O‘zi ikkitagina harfdan iborat bo‘lsa-da, bu so‘z qalblarni larzaga keltiradi. Norozilik maʼnosini bildiradigan bundan ham kichikroq so‘z bo‘lsa, Alloh taolo Qurʼoni Karimda uni ham aytib o‘tgan bo‘lar edi.

8. Ularga muloyimlik bilan “Otajon”, “Onajon” deb murojaat qilish, hargiz ismlari bilan chaqirmaslik;

9. Ulardan ranjimaslik, xafa bo‘lmaslik, asabiylashmaslik;

10. Ularga yuksak ehtirom ko‘rsatish. Solih zotlardan biri onasi bilan birga ovqatlanmas ekan. Odamlar buning sababini so‘rashsa, «Onam dasturxondagi taomlardan birini yemoqchi bo‘lsalar-u, men o‘sha taomga avvalroq qo‘l uzatib, yeb qo‘ysam, oq bo‘lib qolishdan qo‘rqaman», degan ekan.

11. Ularni rozi qilishga harakat qilish;

12. Ularni darg‘azab qilmaslik;

Alloh taolo Qurʼoni Karimda payg‘ambarlarning ota-onasiga ko‘rsatgan hurmat-ehtiromlarini bayon qilgan.

Yusuf alayhissalom Misrning podshohi bo‘lib turgan vaqtda ota-onasi saroyga kirib keladi. Yusuf alayhissalom darhol taxtdan tushib, taxtga ularni chiqarib, yuksak ehtirom ko’rsatadi.

Manba: «Rasululloh sollallohu alayhi vasallamning yoshlarga nasihati» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi