Umr xatosi

Somiy ismli bola otasi bilan bozorda ketib borardi. Orqasidan bir kishning: «Men hisobda adashdim, ha, men hisobda adashdim”, deganini eshitdi.

Orqasiga qarasa, juldur kiyim kiygan yoshi katta chol turardi. Somiyning otasidan pul so‘radi. Otasi unga ozroq pul berdi.

U chol yurib yana: «Men hisobda adashdim”, der edi. Uyiga kelgach, Somiy qariyaning aytgan so‘zlarini o‘ylay boshladi. Nima uchun aytilgani sababini topa olmadi. Otasining oldiga borib: «Bozorda biz uchrashgan cholni eslayapsizmi?” deb so‘radi. Otasi: «Ha, eslayapman”, dedi. «Uning tinmay: «Men hisobda adashdim”, deganini eshitdim. Otajon, nima uchun bu so‘zni doim qaytarib yuradi?” so‘radi yana. Otasi aytdi: “Men senga nima bo‘lganini aytib beraman. – Uzoq yillar oldin shahrimizga boshqa yurtdan 20 yoshli yigit ishlab, pul topish uchun kelgan edi. U kecha-kunduz qiynalmay ishladi. Yillar o‘tib eng boy odamga aylandi. Uning savdosi yurishib, harakatlari tufayli yaxshi natijaga erishdi. Yashash uchun o‘ziga qasr qurdi. Oradan yillar o‘tdi.

U 50 yoshga kirdi. Ishlari, savdo-sotig‘i turli yurtlarga tarqaldi. Bir kuni qasrida o‘tirib o‘ziga o‘zi: “Men umrimni mol-dunyo to‘plashga sarfladim. Oila qurish, farzand haqida o‘ylamadim ham. Ushbu behisob boyligimni kimga qoldirib ketaman? Yashasam, 80 yil umr ko‘raman. Shuning uchun pullarimni o‘zimga sarflayman”, dedi. U pullarini orqa-oldiga qaramasdan ishlataverdi. 10 yil deganda esa bor-budi tamom bo‘ldi. So‘ng mulklari, do‘konlar va ulardagi narsalarni ham sota boshladi.

Qasridan boshqa hech narsasi qolmadi. U hamma narsasini sotib, tugatib bo‘ldi. Yumushlarga yaramay qoldi, ammo yashashda ham davom etardi

Keyingi yillarda do‘stlari, tanishlarining yordami evaziga yashadi. Ammo ular ham o‘lib ketdi. Shunday qilib, u 90 yoshga kirdi. Pul oladigan hech qanday tanish-bilishi, og‘aynilari qolmadi”. Hozir u 100 yoshga kirgan va hali ham tirik. Shuning uchun bozorlarda tilanchilik qiladi va tinmay: “Men hisobda adashdim”, deb yuradi.

Saboq: inson hayoti davomida muvozanatni saqlay bilishi lozim.  Hayotining barcha qismini faqat mol-dunyo to‘plash yoki ishlamasdan boshqalarning sadaqasini kutib o‘tirishga vaqt sarflash yaxshi emas.Yana shuni yodda tutish lozimki, inson qachon o‘lishini hech qachon bilmaydi.

«365 kunga 365 ibratli hikoya» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi