Farzandingizning bo’yi baland bo’lishini istaysizmi?

Har bir ota-ona bolasining sog’lom o’sishini xohlaydi. Ba’zi ota-onalar uchun bolasining bo’yi baland bo’lishi ham muhim.

Janubiy Koreya tadqiqodchilari koreys xalqi bolalarining bo’yini o’stirish maqsadida ko’plab tadqiqotlar o’tkazgan. Bu tadqiqotlar orqali bolaning bo’yini tez o’sishi uchun hamma sport turlaridan eng oson va hammabopi oddiy prigalkada sakrash ekanligi aniqlangan. Koreya hukumati ushbu tadqiqotning samarini tekshirib, prigalkada sakrashni maktab programmasiga kiritgan. Natijada, tadqiqot qo’llanilgach umumxalq bolalarining o’rtacha bo’yi oldingiga nisbatan oshganligi aniqlangan.

Shuning uchun, bolaning bo’yi balandroq bo’lishini istasangiz, unga moliyaviy mablag’ talab qilmaydigan oddiy prigalka olib bering.

Unda har kuni sakrab yursin. Boshida kuniga 10 marta bo’lsa, keyinchalik bu ko’rsatkichni 200 tagacha oshirsa bo’ladi. Prigalkada sakrash 4-5 yoshdan so’ng tavsiya etiladi.

Birinchidan, bu bolaning umumiy salomatligi uchun nihoyatda foydali.

Ikkinchidan, bolaning o’qish va darslardan olayotgan stressi prigalkada sakraganda yo’qoladi.

Uchinchidan, bolaning bo’yi o’sadi.

Bolaning bo’yi qancha bo’lishi birinchi navbatda irsiyatga bog’liq, lekin ba’zi tabiiy yo’llar bilan bolaning bo’yini balandroq bo’lishiga erishish mumkin. Bu haqida Janubiy Koreya mutaxassislari bergan ma’lumot bilan tanishing.

Bola bo’yining o’sishiga uch omil bilan ta’sir qilsa bo’ladi:

1-omil – Ovqatlanish.

Oqsilga boy mahsulotlar (qizil go’sht, tuxum va boshqalar), yashil rangdagi sabzavotlar va kalsiy moddasiga boy mahsulotlar(sut va sut mahsulotlari, qatiq, pishloq va hokazo) bolaning bo’yi o’sishiga ijobiy ta’sir ko’rsatadi. Bolaning kundalik ratsionida ushbu mahsulotlar bo’lishi shart.

2-omil – Uxlash.

Albatta har bir bola uxlaydi, lekin bo’y o’sishi uchun shunchaki uxlash emas, balki chuqur uyquda bo’lish kerak. Uyqu 4 fazadan iborat bo’lib, tun mobaynida bu fazalar o’rin almashadi. Ushbu fazalardan biri chuqur uyqu fazasi bo’lib, shu davrda bo’y o’sishi uchun javob beradigan bez faoliyati tezlashib bo’yni o’stiradigan gormon yaxshi ishlab chiqariladi. Natijada bolaning bo’yi o’sadi. Shuning uchun bolaga chuqur uyquda bo’lish uchun sharoit yaratib berish kerak. Kun mobaynida jismoniy faollik bunga asqatadi. Kompyuter o’yinlarini o’ynash, televizor ko’rish kabi mashg’ulotlar chuqur uyquda bo’lishga to’sqinlik qiladi.

3-omil – Jismoniy mashg’ulotlar.

Har bir jismoniy mashg’ulot ham bo’yning o’sishiga ta’sir qilmaydi. Lekin jismoniy mashg’ulotlar yeyilayotgan kalsiy moddasining bola organizmiga singishiga yordam berishi haqida unutmaslik kerak. Bo’y o’stirish uchun eng kerakli mashg’ulotlar – bu prigalkada sakrash, batutda sakrash va basketbol o’yinidir. Haftada kamida 5 kun 30 daqiqa davomida ushbu mashg’ulotlarni bajarish baland bo’yga ega bo’lishga yordam beradi.

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi