Bolaning koʻzi tez-tez yoshlanishi biror kasallik belgisi boʻlishi mumkin — Mutaxassis

Oftalmologiyaning zamonaviy yoʻnalishi hisoblangan koʻz mikroxirurgiyasi boʻyicha SSV Matbuot xizmati savollariga Respublika ixtisoslashtirilgan koʻz mikroxirurgiyasi ilmiy-amaliy tibbiyot markazi direktori, tibbiyot fanlari doktori Azamat Yusupov javob berdi.

— Bolalarning koʻrish qobiliyati qanday shakllanadi?

— Bolalarning koʻzi oʻziga xos farqli jihatlarga ega. Misol uchun, yangi tugʻilgan chaqaloqning koʻz olmasi kattalarnikidan farqli ravishda sharsimon koʻrinishga ega boʻladi. Oqsil pardasi yupqa, sklerada koʻplab elastik tolalar boʻladi. Goʻdak bir oylik boʻlganda predmetni kuzatish, baʼzida nigohni qadash refleksi rivojlanadi. 2-3 oylikka toʻlganda koʻz oldiga biron narsani birdaniga yaqinlashtirsangiz, koʻzlarini yumib oladi. Bu xavfni sezish refleksi hosil boʻlayotgani belgisidir. 6-8 oyligida esa bola oddiy geometrik shakllarni farqlaydi.

Rangni farqlash qobiliyati ham 2-3 oyligida rivojlanadi. U, eng avvalo, qizil rangni ajratadi. Ranglarni farqlash xususiyati 3-4 yoshigacha shakllanishi kerak. Agar bu jarayonda nuqsonlar boʻlsa, turli koʻz kasalliklaridan darak boʻlishi mumkin. Shu bois, tibbiy koʻrik orqali bolalarning koʻrish aʼzolari rivojlanish bosqichlarini muntazam kuzatib borish lozim.

— Bolaning koʻzi tez-tez yoshlanishi biror kasallik belgisimi yoki asta-sekin oʻtib ketadigan holatmi?

— Koʻz huda-behuda yoshlanmaydi. Ayniqsa, bolalarda bu muammo boʻlsa, tugʻma koʻz yoshi kanallarining yopilishi yoki torayib qolishi, shamollash alomati boʻlishi mumkin. Bunday vaziyatda vaqtni boy bermay, bolani okulist-shifokor koʻrigidan oʻtkazish kerak.

Manba: XS.uz

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi