Qalloblikning yomon oqibati

Bir o’rmonda kiyiklar to’kin-sochin yashar, xotirjam o’tlab yurishar edi.
Bir kuni sel kelib, uylari buzilib, yegani hech narsa qolmadi. Ular maymunlar jamoasiga borib birga
yashab turishlarini iltimos qilishdi.
Bo’rining kiyiklar va maymunlarning ahi -inoq yashashlarini ko’rib hasadi keldi.
Ularning o’rtasida nizo chiqarmoqchi bo’ldi. Maymunlarning boshlig’i oldiga borib: «Kiyiklar sizlarni aldayapti. Kuz kelishidan oldin hamma ovqatingizni yeb tugatishmoqchi. Yeguligingiz tugasa, sizlarni tashlab ketishadi», dedi.

Maymunlarning boshlig’i qattiq g’azablanib, qolgan maymunlarga ham bu xabarni yetkazdi. Ular ham g’azab otiga minishdi va kiyiklarga qarshi jang qilishdi. O’sha janjal asnosida Bo’ri kichik maymunchani yeyish uchun olib ketdi.

Maymunlar nima bo’lganini bilishgach, bu Bo’rining hiylasi ekanini tushunishdi.
Kiyiklardan uzr so’rab, ular bilan birgalikda Bo’ridan qanday qilib qutulish yo’lini axtarishdi. Kiyiklar bir katta chuqur qazib, ustini shox-shabbalar bilan berkitib qo’yishni maslahat berishdi. Maymunlar ular bilan birgalikda chuqur qazib, tepasiga go’sht ilib qo’yishdi.

Ertasi kuni Bo’ri yana maymun yoki kiyiklardan birortasini tutish uchun keldi va go’shtni ko’rib qoldi. Uni olaman deb chuqurga tushib ketdi va qaytib chiqa olmadi. So’ng kiyiklar va maymunlar yana ahil holda yashay boshladilar.
Saboq: insonga aql berilgan. Maymunlarga o’xshab birovning aytgan gapini tekshirmasdan, unga ishonib bolmaydi. Aytilgan gapni tekshirmasdan qabul qilgan odam boshqalarga zarar yetkazib, so’ng afsus qiladi. Kim birovga choh qazisa, unga o’zi tushadi.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi