Otaga itoat qilish kerak

Bir Maymun o‘zining kichik bolasi bilan birga yashar va uni juda yaxshi ko‘rardi. Baʼzan o‘zi bilan tashqariga olib chiqar, gohida uyda qoldirardi. Kichik maymun esa o‘zini yovvoyi hayvonlardan himoyalashni bilmasdi. Otasi bir kuni kichik bolasiga eshikni hech kimga ochmasligini tayinlab, yegulik qidirib chiqib ketdi.

Bolasi uyda zerikib ketdi. Derazadan tashqarida yurgan hayvonlarni kuzata boshladi. O‘sha atrofda yurgan ayyor Tulki uni ko‘rib qolib tutib yemoqchi bo‘libdi. Otasi uyida bor-yo‘qligini bilish uchun uning oldiga kelib:

– Men otangning do‘stiman, uni ko‘rmoqchi ekanimni ayt, chiqsin, – dedi.

– Otam uyda yo‘q, yegulik olib kelgani ketgan.

– Uni ichkarida kutsam bo‘ladimi?

-Yo‘q, menga yo‘qligida eshikni ochmaslikni tayinlagan.

–Otang nima uchun bunday qiladi?

– Chunki men hali kichkinaman.

-Otang bu ishi bilan seni o‘yinlardan, hayotdan zavq olishdan mahrum qilibdi. Sen chiqib boshqa hayvonlar bilan o‘ynashing, mustaqil ekaningni ko‘rsatishing kerak.

– Siz to‘g‘ri aytasiz, amaki!

– Endi tushundingmi, ichkariga meni kiritasanmi?

-Albatta, hozir eshikni ochaman.

Maymun bolasi eshikni ochmoqchi bo‘ldi. Lekin eshik qattiq berkitilgan edi, ocha olmadi. Derazaga qaytib kelib aytdi:

– Eshikni ocha olmayapman.

– Unda tashqaridan sindiraman.

-Yo‘q, unday qilmang, otamning jahli chiqadi.

-Otangning jahli chiqmaydi, axir u mening do‘stim-ku!

Tulki eshikni sindirishga harakat qildi, lekin kuchi yetmadi. Juda qattiq g‘azablandi. Chunki oson qo‘lga kiritishi mumkin bo‘lgan o‘ljasidan ayrilishi mumkin edi. Ochligi bois unga yemoqchi bo‘lib qaradi, so‘laklari oqib ketdi. Maymun so‘radi:

-Amaki, nimaga menga bunday qarayapsiz?

-Jiyan, seni yaxshi ko‘rganim uchun. Eshikni ocha olmadim, derazadan sakray qol, o‘zim seni aylantiraman.

– Yo‘q, otam chiqmasligimni buyurgan.

-Yana otang haqida gapiryapsanmi? O‘yin-kulgu va baxt seni kutib turibdi. Zerikarli hayotni yig‘ishtir. Seni o‘zim ko‘z qorachig‘idek ehtiyot qilaman.

Maymun bolasi uning so‘zlariga ishondi va derazadan sakramoqchi bo‘ldi. Tulki uni pastda poylab turardi. Shu payt otasi kelib qoldi va: “Derazadan sakrama, bolam”, dedi. Tulki qocha boshladi. Maymun bolasi Tulkiga: “Amaki, otam keldi, nima uchun qochib ketyapsiz?” deb baqirdi. Shunda Maymun o‘z bolasidan so‘radi:

– Nima uchun derazadan sakramoqchi bo‘lding?

– Anavi do‘stingiz bilan o‘ynamoqchi edim.

– U mening do‘stim emas, sening amaking ham emas. U – Tulki. Seni yemoqchi bo‘lib kelgan.

– Meni yegani kelgan?

– Ha, shunday. Men senga tashqariga chiqmaslikni tayinlamaganmidim? Sal bo‘lmasa sendan ayrilib qolardim.

Saboq: ota-ona farzandiga mehribon bo‘lsa ham ko‘pincha ular buni bilmaydi. Bola otasiga itoat qilishi lozim. Aziz bolajon! Ota yoki onangiz uyni sizga qoldirib, chiqib ketgan bo‘lsa, begonalar uchun eshikni ochmang. Ota-onaga itoat qilish hamisha yaxshilik olib keladi.

«365 kunga 365 ibratli hikoya» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi