Ota-ona dunyoda ikki marta takrorlanmaydi

Bismillahir Rohmanir Rohiym.
Alloh taologa bitmas-tuganmas hamd-u sanolar bo‘lsin.
Payg‘ambarimizga mukammal va batamom salavot-u durudlar bo‘lsin.

Alloh taolo Qurʼoni Karimda shunday deb marhamat qilgan:

وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا۝ وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا۝

 «Robbing faqat Uning O‘zigagina ibodat qilishingni va ota-onaga yaxshilik qilishnigni amr etdi. Agar huzuringda ularning birlari yoki ikkovlari ham keksalikka yetsalar, bas, ularga “uff” dema, ularga ozor berma va ularga yaxshi so‘z ayt! Ikkovlariga mehribonlik ila xokisorlik qanotingni paslat va «Robbim, alar meni kichiklikda tarbiya qilganlaridek, ularga rahm qilgin», deb ayt». (Isro surasi, 23-24 oyatlar)

Alloh taoloning rahmati tufayli ko‘zlaringni ochgan lahzangdan boshlab seni yaxshi ko‘radigan inson — onangdir.

Alloh taoloning madadi bilan muhabbatini ko‘zlarida zohir qilmay seni yaxshi ko‘radigan inson — otangdir. (sen esa unga zulm qilasan)

*****

Alloh taoloning rahmati sababli onang seni dunyoga keltirgan.

Alloh taoloning madadi bilan otang senga dunyoni tortiq qilishga urinadi. Agar ularni rozi qilmasang, badbaxt bo‘lasan.

*****

Alloh taoloning fazli bilan onang sening hayotga kelishingga sabab bo‘ldi.

Alloh taoloning fazli bilan otang senga hayotda qanday yashashni o‘rgatadi.

*****

Alloh taoloning madadi bilan onang seni 9 oy qornida ko‘tarib yuradi.

Alloh taoloning madadi bilan otang seni umr bo‘yi ko‘tarib yuradi. (sen buni sezmaysan ham)

*****

Alloh taoloning yordami bilan onang seni dunyoga keltiradi. Ana shunda qichqiradi. Sen buni eshitmaysan.

Alloh taoloning yordami bilan otang seni tarbiya qilish, yomonlikdan qaytarish uchun ko‘p yillar qichqiradi. (sen esa undan shikoyat qilasan)

*****

Alloh taolo bergan mehr sababli onang sen kasal bo‘lib qolsang, yig‘laydi.

Alloh taolo bergan mehr sababli otang sen yig‘lasang, kasal bo‘lib qoladi.

*****

Alloh taoloning rahmati tufayli onang sening och emasligingga ishonadi.

Alloh taoloning rahmati tufayli otang sening och emasligingni biladi. (sen buni anglab yetmaysan ham)

*****

Alloh taoloning marhamati sababli onang seni bag‘rida ko‘tarib yuradi.

Alloh taoloning marhamati sababli otang seni orqasida ko‘tarib yuradi. (buni bilmaysan)

*****

Alloh taoloning lutfi sababli onang mehr-shafqat bulog‘idir.

Alloh taoloning lutfi sababli otang hikmat bulog‘idir. (sen esa uning qattiqqo‘lligidan xafa bo‘lasan)

*****

Alloh taoloning fazli sababli onang sen uchun masʼuliyatni ko‘tarib yuradi.

Alloh taoloning fazli sababli otang senga masʼuliyatli bo‘lishni o‘rgatadi. (sen esa otam falon ishni menga yukladi deb o‘ylaysan)

*****

Alloh taoloning madadi bilan onang seni yiqilishdan ehtiyot qiladi.

Alloh taoloning madadi bilan otang senga yiqilganingdan keyin turishni o‘rgatadi.

*****

Alloh taoloning fazli bilan onang senga oyoqda yurishni o‘rgatadi.

Alloh taoloning fazli bilan otang senga hayot mashaqqatlarida qanday yurishni o‘rgatadi.

*****

Alloh taoloning lutfi sababli onangni shafqatli, chiroyli ayol deb bilasan.

Alloh taoloning lutfi sababli otangni jiddiy, mehrli inson deb bilasan.

*****

Alloh taoloning marhamati sababli onangning muhabbatini tug‘ilganingdan boshlab his etasan.

Alloh taoloning marhamati sababli otangning muhabbatini biroz katta bo‘lganingda his etasan.

*****

Ota-onaning qadri pul bilan o‘lchanmaydi.

Ota-ona dunyoda ikki marta takrorlanmaydi.

Nozimjon Hoshimjon tayyorladi

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi