Onasini aldamagan Abdulqodir G‘iloniy

 So‘fiylikning mashhur shayxlaridan Abdulqodir G‘iloniy (rahimahulloh) bunday hikoya qiladi: «Bolaligimdan meni to‘g‘riso‘z, rostgo‘y bo‘lishga o‘rgatishgan edi. Bir kuni Makkadan chiqib, ilm olish maqsadida Bag‘dodga boradigan bo‘ldim. Onam yo‘l xarajatlari uchun qirq dinor pulni choponim qatiga tikib berar ekan, mendan hech qachon, har qanday holatda ham yolg‘on gapirmaslik haqida vaʼdamni oldi. Karvon bilan Hamadon o‘lkasiga yetganimizda qaroqchilar to‘dasi hujum qilib, karvondagilarning bor-budini tortib oldi. Qaroqchilardan biri: «Sening nimang bor?» deb so‘radi. Men: «Choponim qatida qirq dinor oltinim bor», deb rost gapirdim. U hazillashyapti, deb o‘ylab nari ketdi. Boshqa qaroqchi yana shu savolni berdi va unga ham qirqta oltinim borligini aytdim. U meni to‘da boshlig‘iga olib bordi. Boshliq: «Rostini aytishga seni nima majbur qildi?» deb so‘radi. Men: «Onamga hech qachon yolg‘on gapirmayman, deb vaʼda berganman», dedim.

Shunda qaroqchilar boshlig‘ini birdan qo‘rquv bosdi. U qichqirganicha ushbu so‘zlar bilan o‘z kiyimlarini yirta boshladi: «Sen onangga bergan vaʼdangni buzishdan qo‘rqib, oltinlaringni ko‘rsatyapsan, men esa Allohga bergan vaʼdamni buzishdan qo‘rqmayapman».

Keyin u odamlariga barcha tortib olingan narsalarni qaytarib berishni buyurdi va: «Mana, sening huzuringda gunohlarim uchun Allohga tavba qilyapman», dedi. Boshqa qaroqchilar ham unga: «Sen talonchilikda bizning to‘daboshimiz eding, endi tavba qilishda ham rahnamoyimiz bo‘l!» deyishdi.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi