Nuh alayhissalom qissasi

BISMILLAHIR ROHMANIR ROHIYM

Kecha qaysi paygʻambarlarning qissalarini oʻrgangan edik? Kim javob beradi?

Iblis farishtalardan ekanmi, jinlardan ekanmi?

Bugun Nuh alayxissalomning qissasini oʻrganamiz, inshaalloh. Qani, boshladik, bolajonlarim.

1

                Alloh azza va jalla Nuh alayhissalomni oʻz qavmini Allohga ibodat qilishga chaqirish, but-sanam, haykallarga ibodat qilishni tark etishga daʼvat qilish uchun paygʻambar qilib yubordi. Nuh alayhissalom ularni daʼvat qila boshladilar. U zotning daʼvatlariga kambagʻal, bechorahol insonlar  ergashdilar. Boylar, boshliq, rahbar insonlar esa u zotning daʼvatlarini rad etdilar va u zotdan “biz senga ergashishimiz uchun iymon keltirgan bechora, miskin, kambagʻallarni tark qilasan, ulardan voz kechasan” deb talab qoʻydilar.

2

Nuh alayhissalom iymon keltirgan zaifhol odamlardan voz kechish talabini qatʼiy rad etdilar. Qavmini daʼvat qilishda noumidlikka tushmadilar, balki ularni kecha-yu kunduz Alloh taloning yoʻliga daʼvat qilaverdilar. Lekin qavmidagi nobakor insonlar u zotni yolgʻonchi, adashgan, majnun, jinni deb ayblashdan ham toymadilar. Shunda Nuh alayhissalom ularga bunday dedilar: “Ey qavmim! Menda zalolat yoʻq. Va lekin men olamlarning Rabbidan Payg’ambarman.” (Aʼrof surasi, 61-oyat).

3

Nuh alayxissalom oʻz qavmini ming yilga yaqin muddat ichida tinimsiz daʼvat qildilar. Allohning yoʻliga chaqirdilar. Ammo iymon keltirmagan qavm esa Nuh alayhissalom bilan urishib, mujodala qilib, u zotga ozor berishda davom etaverdi. Shunchalik uzoq yillar, toʻqqiz yuz yildan ortiq muddat natijasiz, besamar ketdi. Lekin Nuh alayhissalom daʼvat qilaverdilar. U zotga qavmining koʻpchiligi, ayniqsa, boy-badavlat odamlar iymon keltirmadilar. Iymon keltirganlar esa ozchilikni tashkil etardi. Shunda Nuh alayxissalotu vasallam Alloh taloga yuzlanib duo qildilar va qavmini tugʻyonga, zulmga ketganini, Nuh alayhissalomga va unga iymon keltirgan odamlarga koʻplab zulm qilganlarini shikoyat qilib bunday dedilar: “Ey Rabbim! albatta, ular menga isyon qildilar va moli, bola-chaqasi xusrondan boshqani ziyoda qilmaganga ergashdilar.” (Nuh surasi, 21-oyat).

4

Kofirlar Nuh alayhissalomga tahdid qilib biz seni oʻldiramiz, toshboʻron qilamiz, deb qoʻrqitdilar. Shundan soʻng Alloh talo Nuh alayhissalomga qavmidan shu kungacha iymon keltirmaganlar endi iymon keltirmasligining, ularni kofirligicha qolishlarining, avval iymon keltirganlar esa moʻmin boʻlgani, endi qavmidan hech kim iymon keltirmasligining xabarini berdi. Shundan soʻng Nuh alayhissalom bu kofir qavmining halokatini soʻrab duoyibad qildilar: “Ey Rabbim! yer yuzida kofirlardan birorta ham harakatlanuvchini qo’ymagin. Albatta, Sen ularni tek qo’ysang, bandalaringni adashtiradilar va fojir-u kofirdan boshqa tug’maslar.” (Nuh surasi, 26-27-oyatlar).

5

Shundan soʻng Alloh talo Nuh alayhissalomga bir kema yasashni vahiy qildi (buyurdi). Nuh alayhissalom va u zotga iymon keltirgan moʻminlar kema yasashni boshladilar. Kofirlar esa Nuh alayhissalom va moʻminlarni mazax, masxara qilardilar. Sahroda boʻla turib bular nima uchun kema yasashyapti, deb ustilaridan kuldilar. Shunda Nuh alayhissalom ularga: “Tez kunda Allohning azobi tushganda, bu ishlarning haqiqatini bilib olasiz”, dedilar.

6

Kema bitgach Alloh talo Nuh alayhissalomga tez orada yerga toʻfon yuborib, kofirlarni suvga gʻarq qilishini vahiy qildi. Va toshqin boshlanishining alomati, belgisi isitgichda turgan suvning toshishi ekanini, yaʼni, suvning toshishi yer yuzida toshqin boshlanishini bildirardi. Mana shu belgi maʼlum boʻlgach Nuh alayhissalom toʻfonning alomati ekanini bilib, tezlik bilan moʻminlarni kemaga chiqardilar. Har bir hayvondan bitta erkak, bitta urgʻochisidan olib kemaga yukladilar. Shundan soʻng shiddatli yomgʻir yogʻib, toʻfon turib yerni suv bosa boshladi.

7

Shu payt Nuh alayhissalom oʻzining oʻgʻlini koʻrdi va unga: “Oʻgʻlim, biz bilan kemaga min”, deb xitob qildilar. Lekin kofir oʻgʻil otasining bu maslahatiga quloq solmadi. Tez orada toʻfon shunchalik kuchaydiki, suv togʻlarni ham koʻmib ketdi. Natijada, Nuh alayhissalomning oʻgʻli ham kofirligicha oʻz qavmi kofirlari bilan suvga gʻarq boʻlib, halok boʻldi. Shundan soʻng yomgʻir sekinlashib toʻfon ham tindi. Yer asta-sekin ustidagi suvni shimib ola boshladi. Suv sathi pasayib, unda suzib yurgan Nuh kemasi Judiy togʻida toʻxtadi. Nuh alayxissalom va u zotning ummatlari – moʻminlar kemadan tushdilar. Shu bilan yer yuzida yangidan hayot boshlandi. Nuh alayhissalom to vafot etgunlaricha moʻminlar bilan birga yashab qoldilar.

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi