Kutilmagan joydan kelgan rizq

Bir kishi oilasini boqa olmas darajada qiynalib qolibdi. Ming harakat qilsa ham pul topa olmabdi. Kunlarning birida ayoli: “Dadasi, biz juda och qoldik. Chiqib biror narsa topib keling, ochlikdan o‘lib qolishimiz mumkin” deb shikoyat qilibdi. Haligi kishi bir qarindoshinikiga borib qarz so‘rabdi. U: “Uyimizda pul yo‘q, lekin biroz aynigan balig’imiz bor. Shuni olib ketavering”, debdi.

Er aynigan baliqni olib uyiga olib boribdi. Ichini tozalayotib qimmatbaho durga ko‘zi tushib qolibdi. Darhol uni olib, bozorga borib 1000 dinor (oltin tanga)ga sotibdi va qarindoshiga pulni olib borganda: “Men faqat sizlardan o‘z nasibamni olaman”, debdi va pulning oz qismini olibdi.U kishi birgina aynigan baliq tufayli boy bo‘lib, hayoti iziga tushib ketibdi.

Hikoya qilinishicha, Ibrohim ibn Adham ovqat yeb o‘tirar edi. Shu payt oldiga bir mushuk kelibdi va unga bir parcha go‘sht tashlabdi. Mushuk esa go‘shtni yemasdan olib chiqib ketibdi. Ortidan kuzatib borsa, u go‘shtni bir uyaga tashlabdi. Ibrohim ibn Adham yaqinroq borib qarasa, ko‘zi ko‘r ilon turgan ekan. Shunda u kishi: “Ey dushmanlarni ham bir-biriga bo‘ysundirib qo‘ygan Zot! Sen barcha ayb va nuqsonlardan poksan”, debdi.

Saboq: inson o‘ziga belgilangan rizqining kelishiga chindan ishonishi kerak. Rizq uni unutmaydi va qayerda bo‘lsa ham topib keladi. Qiyinchiliklar qanchalik ko‘p bo‘lmasin, shodlik ayyomi albatta kelgusi. Faqat buning uchun biroz harakat qilish kifoya.

Manba: «365 kunga 365 ibratli hikoya » kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi