Kemadagi o’g’ri va halol yigit

Umar ismli bir yigit ota-onasi bilan birga yashar edi. Ammo ular juda kambag‘al bo‘lib, Umar boshqa mamlakatga pul topish uchun safar qilibdi. U yerga dengiz orqali borar edi.

Bir yil davomida ishlab halol pul topibdi va uyi tomon kemada yo‘lga chiqibdi. Charchab uxlab qolgan mahal to‘satdan bir kishining ovozi eshitilibdi: “Menga hamma pullaringni berasan, yo‘qsa, o‘ldiraman”, debdi bir kimsa. Shunda Umar:

– Xudodan qo‘rq. Men bu pullarni bir yil qiynalib topganman. Oilamdagilar qiynalib qolishgan, ularga olib borishim kerak.

-Bermasang, o‘ldim, deyaver.

-Mayli, yarmini olaqol. Qolganini esa oilam uchun qoldir.

– Hammasini olaman.

– Xudo haqqi, senga hech narsa bermayman. Xohlaganingni qil. Bu pullar halol, shuning uchun menga Yaratganning O‘zi kifoya qiladi.

O‘g‘ri pichog‘ini chiqarib, Umarga o‘qtaldi. Shunda xayolga kelmaydigan ish sodir bo‘ldi. Oyoq bosishi bilan kema yog‘ochidagi mix o‘g‘rining oyog‘iga kirib, pichog‘i ham tushib ketdi. U og‘riqqa chiday olmay baqira ketdi.

Umar tezda mixni oyog‘idan chiqarib oldi va qonni to‘xtatdi. Jarohatini dastro‘moli bilan bog‘lab qo‘ydi. O‘g‘ri Umarning qilgan ishini ko‘rib yig‘lab yubordi va:

– Men seni bir necha soniya oldin o‘ldirmoqchi bo‘lsam ham menga qilayotgan yaxshiligingni qara.

– Men seni kechirib yubordim. Lekin endi bu ishingdan qayt. Bilib qo‘yki, harom mol insonga dunyo va oxiratda foyda bermaydi, – dedi Umar.

O‘g‘ri qilgan ishlariga tavba qildi va to‘g‘ri yo‘lga qaytdi. Umar ham to uyiga yetguncha uning jarohatiga qarab, yana yaxshiliklar qilibdi.

Saboq: inson ota-onasiga yaxshilik qilishi, ularga qayerdan bo‘lsa ham halol pul topib kelishi lozim. Yaxshi inson o‘zgalarni xursand qiladi, yomonlikka ham yaxshilik bilan javob qaytaradi. Yaxshi fazilatlari tufayli boshqalarning to‘g‘ri yo‘lga qaytishiga ham sababchi bo‘ladi.

«365 kunga 365 ibratli hikoya» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi