Go‘zal xulq-dunyo va oxiratdagi saodatdir!

Insonning tashqi ko‘rinishi go‘zal bo‘lgani kabi uning ichki ko‘rinishi ham shunchalik go‘zal bo‘lishi muhimdir. Alloh taolo kalomi  Qur’oni karimda:

“Batahqiq, Biz insonni eng yaxshi suratda yaratdik”, deb marhamat qilgan.

Demak, inson shu go‘zal suratda qolishga harakat qilib yashashi kerak. Buning uchun u husni xulq egasi bo‘lishi zarur. Husni xulq o‘zi nima? Va uni qayerdan hosil qilish mumkin? Albatta, husni xulq sohibi bo‘lish uchun barcha go‘zal odob-axloqlar sohibi Payg‘ambarimiz Muhammad sollallohu alayhi vassallamning xulqi va odoblarini o‘rganish maqsadga muvofiqdir.

Alloh taolo u zotning xulqlarini maqtab: “Albatta, Siz buyuk xulq uzradirsiz!” – dedi. Payg‘ambarimiz Muhammad alayhissalom ham muborak hadislarida shunga ishora qilib, “Aslida, men oliyjanob xulqlarni kamoliga yetkazish uchun yuborilgandirman”, deya marhamat qilgan edilar.

Shunday ekan, har bir musulmon banda Payg‘ambarimiz sollallohu alayhi vasallamning siyratlari haqida chuqur bilimga ega bo‘lishi lozim. Har bir amalning asosida ilm bo‘lganidek, husni xulq egasi bo‘lishning ham zamirida ilm turadi. Kim agar ilm talabida bo‘lsa, Alloh uni yaxshi ko‘radi va Alloh yaxshi ko‘rgan bandasini dinda faqih (bilimdon) qilib qo‘yadi.

Shulardan xulosa qilib, Payg‘ambarimiz sollallohu alayhi vasallamning siyratlari va sunnatlari yozilgan manbalarni qunt bilan o‘rganib, u zotning bebaho sunnatlariga amal qiladigan bo‘lsak, Alloh taoloning sevimli bandalaridan bo‘lishimiz, ya’ni faqih bo‘lishimiz, shu bilan birga husni xulq egasi bo‘lishimiz mumkin ekan. Bundan tashqari, ilm o‘rganishda e’tiborli bo‘lib, dunyo va oxiratda foydasi bor ilmlarni o‘rganishimiz maqsadga muvofiq bo‘ladi.

Hasan Basriy rohmatullohi alayhi aytadi: “Odamlar, ilmni egallanglar va ilm olish uchun sokin, muloyim, viqorli bo‘linglar, ta’lim olayotgan va berayotganlarga tavozuli bo‘linglar. Olimlik bilan faxrlanmanglar, ahmoqlar bilan tortishmanglar va ilm bilan amirlarga aralashib ketmanglar. U bilan Allohning bandalaridan o‘zingizni baland tutmanglar, agar unday qilsangiz, Allohning g‘azabida qolgan, jahannamga yuztuban tashlanadigan zulmkor ulamolardan bo‘lib qolasizlar. Ilmning Allohga ibodatda xalal bermaydiganini talab qilinglar, shuningdek, Allohga ibodat qiling, ilmlaringizga zarar bermaydigan bo‘lsin. Ilm foyda bermaydi, magar yuqoridagi gaplarga amal qilinsagina foyda beradi. Ilmni tashlab, faqat ibodatga yuz tutgan qavmdek bo‘lmanglar. Ularning terilari badanlariga yopishib ketsa ham, odamlarning oldiga qilich bilan chiqadilar. Agar ular ilmni talab qilsalar edi, ilmlari qilgan ishlaridan to‘sgan bo‘lardi”.

Agar aytilganday foydali ilmlarni egallab, husni xulqimiz bilan insonlarga o‘rnak bo‘lsak, ayniqsa, hozirgi vaqtda hisobsiz, har xil axborotlar qarshisida gangib qolgan yoshlarimizni to‘g‘ri yo‘lga boshlasak, musulmonlik burchimizni bajargan bo‘lamiz.

Alloh taolo barchamizni sevimli payg‘ambarimizdek husni xulq egasi bo‘lib va O‘zi yaxshi ko‘rganidek ilm sohibi bo‘lishligimizni nasib qilsin!

Manba

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi