Dunyo hayotining haqiqati

Bismillahir Rohmanir Rohiym.
Alloh taologa bitmas-tuganmas hamd-u sanolar bo‘lsin.
Payg‘ambarimizga mukammal va batamom salavot-u durudlar bo‘lsin.

Onamni yo‘qotgach, qalb shodligidan mahrum bo‘lganman. Fursat qo‘ldan ketmay turib, onalaringiz bilan yashash baxtidan bahramand bo‘ling…

Hayotimning dastlabki davrida otam bilan birga yashadim. O‘sha paytlarda otamdan ajralib qolishimni, ularsiz yashashimni tasavvur qila olmas edim. Otam vafot qildilar…

Keyin aka-ukalarim bilan birga yashadim. Ammo ulardan ham ajralmasam kerak, deb o‘yladim. Ular oilali bo‘lishgach, har biri o‘z oilasi bilan yashay boshladi.

O‘zim ham oila qurdim, farzandlar ko‘rdim. Ulardan ajralsam yashay olmasam kerak, degan xayolga bordim. Vaqt o‘tib, ular ham oilali bo‘lib, o‘z yo‘llarida davom etishdi…

Shundan so‘ng bildimki, inson Robbi bilangina doim birga qolar ekan. Barcha rishtalar uzilar, faqat olamlarning Robbi Allohga bog‘liqlik qolar ekan, xolos!

Sevgan kishing hayot bilan vidolashib, uning qabriga bir siqim tuproq sochgach, dunyoning arzimas narsa ekanini, unda hech kim boqiy emasligini tushunib yetasan. Umrimizni qisqartirib borayotgan kunlarning aslo qaytmasligini juda yaxshi bilamiz.

Shunday ekan, o‘zingiz uchun Qurʼondan kundalik virdlar – vazifalarni odat qiling va ularni qanday bo‘lsa-da, aslo tark qilmang. Har kuni, har dam tasbeh, istig‘for, tahlil aytish, Rasululloh sollallohu alayhi vasallamga salavot aytish bilan mashg‘ul bo‘ling.

Unutmang: jannatiylar hech bir ish uchun Allohni zikr qilmagan paytlariga achingandek nadomat chekishmaydi.

Manba