Bolaning fe’l-atvorini anglash va uni avaylash

Umumiy mazmuni:

• Kichkintoylar atrofdagi dunyoni anglab yetishi bilan ularning xatti-harakati o’zgaradi.
• Kichkintoyning xulq-atvori ko’pincha o’zi yoqtiradigan, qo’rqadigan yoki u uchun qiziq bo’lgan narsalarga javob bo’ladi.
• Farzandingizning muloqot darajasi yaxshilansa, uning fe’l-atvorini tushunish osonlashadi.

Bolaning xulq-atvori va qiziqishi bir biriga qanday bog’liq?

Chaqaloqlarning dastlabki tajriba va munosabatlari ularning miyasini rag’batlantiradi, dunyoni ko’rishi va unga bo’lgan munosabatini shakllantiradi. Bu tajribalar orqali uning dunyo haqidagi bilimlari oshib boradi, shu zaylda chaqalog’ingiz rivojlanadi va o’sadi. Shunda siz farzandingiz xatti-harakatlarida bir qancha o’zgarishlarni ko’rishingiz mumkin bo’ladi.

Kichkintoyingiz tez orada sizni boshqalardan ajratishni o’rganadi. Uning siz va boshqa g’amxo’rlari bilan bo’lgan munosabati – o’zining dunyo va unga qanday munosabatda bo’lishini bilishning asosiy usuli hisoblanadi. Shuningdek, chaqalog’ingiz sizni kuzatish orqali o’zini qanday tutishi borasida ko’p narsalarni o’rganib oladi.

Chaqalog’ingizni nima baxtli qiladi?

Chaqalog’ingiz o’z dunyosidagi eng yaqin odamlariga qattiq bog’lanib qoladi. Bu odamlar o’zlarini bu chaqaloqqa sevdirgan, xavfsiz va xotirjam his qilishiga sabab bo’lgan odamlardir. Agar, ko’pincha, siz yoki turmush o’rtog’ingiz tomonidan chaqaloq parvarishlansa, ehtimol, sizning chaqalog’ingiz boshqalardan ko’ra sizni yoki ikkalangizni birdek yaxshi ko’radi.

Xuddi shunday, chaqalog’ingiz bitta o’yinchoqni boshqalariga qaraganda ko’proq sevishi mumkin.

Shunday qilib, sevimli o’yinchoqlari bilan o’ynash va yoqtirgan insonlari bilan bo’lish chaqalog’ingizni baxtli qiladi, va siz buni chaqalog’ingizning xatti-harakatlarida ko’rasiz. Qachonki, chaqalog’ingiz baxtli, xursand bo’lsa, ular tabassum qilib, quvnoq ovoz chiqarishi mumkin. Chaqalog’ingiz hatto sevimli odamlarini ko’rganida qo’l silkitishi yoki qarsak chalishi ham mumkin.

Chaqaloqni nima bezovta qiladi?

Chaqalog’ingiz hammom va boshqa narsalardan qo’rqishi mumkin. Shuningdek, u hayotdan nimani kutish kerakligini o’rgangach, kutilmagan hodisalar ularga yoqimsiz tuyilishi mumkin. Masalan, chaqalog’ingiz tanimagan odamlaridan qo’rqishi yoki bunday odamlar uni xavotirga solishi mumkin.

Bundan tashqari, chaqalog’ingiz uning yaqin odami ekanligingizni tushunganida, siz ketayotganingizda xafa bo’lishi yoki yig’lab yuborishi mumkin, chunki ular sizning qaytib kelishingizni bilishmaydi.

Notanishlardan qo’rqish va yaqinlaridan ajralish tashvishlari juda tez-tez uchraydi va odatda, biroz ulg’ayganidan keyin asta-sekin yo’qoladi.

Chaqaloqni nima qiziqtiradi?

Kichkintoyingiz uchun ko’p narsalar qiziq. Shuning uchun ham chaqalog’ingiz dunyo haqida judayam ko’p narsalarni bilishni istaydi.

Chaqalog’ingiz obyektlar bilan ulardan nima maqsadda foydalanishni bilish uchun tajriba o’tkaza boshlaydi. Bu telefoningizni suv solingan idishga solib qo’yishdan tortib shakar idishini gilamchaga ag’darishgacha bo’lishi mumkin. Ko’pincha bu jarayon chaqalog’ingizning duch kelgan narsani og’ziga solishi bilan yakunlanadi, chunki chaqaloqlar shu orqali narsa-predmetlarni o’rganishadi. Ular agar shunday qilsa, nima yuz berishini bilish uchun narsalarni tishlab, chimchilab yoki silkitib ko’radilar.

Taxminan 6-12-oylar bolangizning xulq-atvorini shakllantirishda chegaralarni yengilroq belgilashni boshlash uchun qulay vaqt hisoblanadi. Masalan, chaqalog’ingiz pechga yaqinlashsa, siz: «Yo’q, pech issiq», deb aytishingiz va chaqalog’ingizni xavfsiz joyga olishingiz mumkin.

Chaqalog’ingiz xavfni bilmaydi, shuning uchun, ayniqsa, bola harakat qila boshlaganda, xavfsiz uy sharoitini yaratish juda muhimdir. Masalan, chaqalog’ingizni oshxonadan va issiq, kuyib qolishi mumkin bo’lgan joylardan uzoqroq tutish uchun darvoza qo’yishingiz yoki boshqa usullarni qo’llashingiz lozim.