Ajoyib sandiq qissasi

Bag’dod shahridagi bir attorning oldiga kambag’al kishi keldi va ayoli uchun zarur narsalarni 10 dirhamga olib ketdi. Yo’lda qoʻlidagi narsalar toʻkilib, tuproqqa aralashib ketdi. U kishi to’xtab yigʻladi va:

-Men 3 yil oldin karvonda 4 ming dinor pul va yana shu pulga teng dur-javohirlari bor sandig’imni yoʻqotganimda ham bunchalik achinmaganman. Xotinim farzand koʻrish arafasida, hozirgi narsalar juda zarur edi. Boshqa pulim yoʻq, endi nima qilaman, – dedi.

– Shu onda kutilmagan ish sodir boʻldi. Attor do‘koni oldida bir kishi uning soʻzlarini eshitib o’tirardi. Kambagʻal kishini chaqirib:

– Men sen bilan gaplashib olmoqchiman,- dedi. Ular haligi kishining uyiga kirishdi. Biroz oldin yigʻlab aytgan sandig‘i haqida soʻradi. Uning tuzilishi, rangi va ichidagi narsalarni aytib berdi. U odam ichkaridan bir sandiq olib chiqdi va: “Bu o’sha sandiqmi?” deb so’radi.

– Ha, xuddi oʻzi, deb javob berdi kambagʻal.

Unga sandiqni va ichidagi narsalarni topshirdi. Attordan olgan 10 dirham evaziga 3 yil oldin yoʻqotgan juda katta boyligi qaytib keldi va yana boy odamga aylandi. Odamlar sandiqni qaytib bergan kishidan ajablanishdi va sandiq qanday qilib unga kelib qolganini soʻrashdi. U oʻzini qoʻshinda askar boʻlib ishlaganini, uch yil oldin bir kishi sandiq koʻtarib ketayotganini koʻrganini aytdi. Uning oldiga yaqinlashgach, sandiqni tashlab qochibdi. So’ng shunday dedi:

– Men uning oʻgʻri ekanini bildim, bizni koʻrishi bilan sandiqni tashlab qochdi. Sandiqni olib egasini rosa qidirdim. Egasiga yetkaza olmadim. Hozir esa shunday fursat keldi, oʻlimimdan oldin uni egasiga topshirishga muvaffaq boʻldim.

Ajablanarlisi shundaki, u harbiy sandiqni egasiga bergandan bir oy oʻtib vafot etdi.

Saboq: inson oʻziga yetadigan musibat uchun g’am chekib, ich-etini yemaydi. Bu musibat u uchun katta ne’mat bo’lishi ham mumkin. Hikoyadan olinadigan yana bir xulosa shuki, birovning omonatini egasiga yetkazish lozim. Yana bir xulosa, insonning holati oʻzgarib turadi. Bugun kambag’al boʻlsa, ertaga boy boʻladi yoki aksincha. Shuning uchun qoʻlidagi narsa abadiy boʻladi, deb unga bogʻlanib qolmagan ma’qul.

«365 kunga 365 ibratli hikoya» kitobidan

Farzand tarbiyasiga oid bo’lgan eng yaxshi tavsiyalar jamlangan dasturni yuklab oling.

Linkni bosing: 👉 Farzandim dasturi