Farzand-Allohning ne’mati

 Farzand – Allohning sanab adog‘iga yetib bo‘lmaydigan neʼmatlari ichidagi ulug‘ bir neʼmatdir. U dunyo hayotining ziynatidir.
⠀Alloh taolo shunday marhamat qiladi:
«Osmonlar-u yerning podshohligi Allohnikidir. U Zot xohlagan narsasini yaratur. U Zot xohlagan kishisiga qizlar hadya etur va xohlagan kishisiga o‘g‘illar hadya etur».
(Shuuro surasi 49-oyat)
⠀Surasining keyingi oyatida esa:
«Yoki ularni juftlab – o‘g‘il-qiz qilib berur va xohlagan kishisini tug‘mas qilur. Albatta, U o‘ta biluvchidir, o‘ta qodirdir» degan.
⠀Farzand bizlarga berilgan hadya ekan, omonat ekan. Bu neʼmatning qadriga yetmog‘imiz vojibdir. Bola xoh qiz bo‘lsin, xoh o‘g‘il bo‘lsin Allohning hadyasidir. Shuning uchun qaysi birimizga farzand inʼom qilingan bo‘lsa, unga noshukrlik qilmasdan qadriga yetib shukrini ado etaylik.
⠀Musulmon kishining farzand ko‘rishligi, albatta bu ummatning ko‘payishiga sababdir, dunyoda bir musulmonning ko‘payishiga sababchidir. Shuning uchun qaysi bir xonadonga farzand tug‘ilsa, unga mol-mulkka qaragandek emas yoki mening pushtu kamarimdan bo‘lgan bir arzimas narsa demasdan, balki Allohning bir buyuk bandasi, Rosululloh sollallohu alayhi vasallamning ummatlaridan bir ummat deb diqqat-u eʼtibor bilan nazar qilmog‘i lozim.

Manba